Hma Kat Phion Nak Lah Bawi-awn Ng’Hnguh Nak
Vai hlü-ung kah nang cuh k’chang tumat na kat nak-ung i-ang na bi ko? Na bi vai lei cuh cun-ah k’chang-ah hteit neh ka thüi ci nei ci neh na pyein vai hlü ci.
Hma kat phyon nak bi loh-ung phih acun-ah Bawi Christu-awn bi hnging-ah kia ci. Mikmi noh mi thüi-ah mong cuh mi m’thein tu neh cein kon-ah kat nak kä bi ba khai ci neh mi pyein vai hlü ci. Ani noh ana m’gein nak ba gui-awn atäng-ah mi ghüng om ba neh teih püi-ah mi kia lo ba hnging ca kia ci.
Shin-ah Secramentu bi vai-ung pong htei nak gui phih om ci. Ma pi neh mät-ah kat nak gui i k’chü vei bi cuh shüm nak ba hnging vai phäh Hti theing ca Muh Khanpughü noh ana gung tu vai ng’hui ng’pa nak ba vai. Cun cuh mät noh mät-ah m’lung m’theing m’htaih ba-ah kia ci.
A hngih nak-ung mikmi-ah kat nak noh Bawi Yeisu cuh mi m’thüi-ah mong lah kat nak gui-ah phäh i hlok-ah mi thüi-ah mong cuh mi hmat nak-ah kia ci. Kä bi ba khai ci neh phih mi ng’bäi ca kia ci. Myeita m’cu nak-ung phih mi kat nak gui cuh mi thüi na neh mi ng’yu ba mong cun phih Khanpughü-am mi m’thein tu ci.
A k’thum nak-ung kat nak gui kä k’poih ein na neh K’taigü Bawi-am mi m’thein tu vai hlü ci. Hma kat phyon nak Secramentu kä bi ba nak i hlok asho lo-ah mong gui cuh m’thein tu ma vai. K’taigü Bawi noh Khanpughü lah k’chang hngei gui mi kat nak gui-ah phäh phyon nak vai phäh m’cu vai-ah myeita am’shah lah Khanpughü lah k’chang hngei gui kat nak gui-ah phäh ng’loh ng’chan nak gui bi hnging vai-ah na gung tu gui ci. Cun cuh cang ca ng’tu ng’tun nak ba-ah kia ci.
Kat nak gui m’thein tu nak-ung kanoh kä ng’düi lo ba pha-ung k’taigü Bawi noh Pa ni, ahta ni, hti theing ca muh-ah ng’ming-awn na kat nak gui cuh kaning m’gein ci ci neh pyein lo khai. Cun cuh Bawi Christu mät noh k’taigü Bawi-ung ka noh ana k’phoin gui-ah kia hleih amen ci neh do vai hlü ci. M
Mikmi gui cuh hma kat phion nak Secramentu mi bi ba täih hleih Bawi Yeisu noh na om püi gui neh mikmi-ah m’lung gui cuh na m’tui m’hleih, na m’theing m’htaih pe gui ci. Bawi Yeisu cuh shin-ah Secramentu-ung ka noh ana gün gui cuh amät-ah m’hngi nak, m’gein nak gui cuh ana m’dang gui vai lah k’thagui gui ana peit ba gui vai phäh kia ci.
Kat nak-ung ka noh cang ca ng’yu nak ba-ah m’cu vai cuh
Aw; Pa Khanpughü-aw ka ning kat nak gui-ah phäh-ah thüi hlei neh ka ng’yu ba ci nei. Nang pa Khanpughü-ah taga hleih na peit-ah ng’loh ng’chan nak gui phäh ka kat nak gui avan-ah phäh ka ng’yu ba ci. Cun-ah ka kat nak gui cuh nang Pa Khanpughü cuh ni m’thüi m’hlei ca kia ci. Nang Pa-ah na gung nak tu-awn ka kat nak gui avan ka ng’bäi hnging vai lah ka kat nak gui-ah phäh ka ng’loh hnging vai ni ka ghün om nak-ung phih ka mät noh ka mät ka ng’pyang tham khai ci neh ka ng’bäi ci nei ….Amen.
