Bä ca Robert Bellarmine ah ghünlu a mòng

Bä ca Robert Bellarmine cu Christu kum Pyaaghaleihma lah plikipleigoi (1542) ung Italy Ghung khaw, Montepulciano manggio ung ng’tüi ca kya ci. A khokum 18 ung A pa noh kä yum tu langbang hleih phih Roma ung om ca Society of Jesus ci a Taigü ng’htoi ung lut tu ne Taigü gui noh a mi hmat vai gui cu ng’theithang tu ci. Taigü a akia lo tu kon na Khanpughü ah monglam m’theim’thang thähla khai ah Belgium, Lovain University ah a mi tüih ah kya ci. A cun University ung Protestan huhmat achang gui awn a mi ng’htako vai ah phäh ah a mi thüih a kya ci. Khokum chüih be lo hleih a ni ah htitheing nak lah a bi nak hning awn Roma ung om ca kyawng tumat ung Theology ca m’thei khai ah a mi hteih hlak ah kya ci. Catholic yum nak ghung ca ca uk ung ka no a mi ng’cuh ba mä ci ah ca uk cu a kya ni hleih a ng’dängdäih a a mi yoihtuk ba thi ah kya ci. A cun na ca uk cu thuuk ca ng’thuk k’ni a mong lah yumtu ng’bum ah pa gui a mong a guk ka kia hleih a yoi ne hman tu pi ah ca uk tumat a kya lo ci.

 London mânggio ung om ca ca uk gui yoi ca k’chang tumat noh a hei ca uk gui ah ta phih Taigü Mâng Robert Bellarmine noh a guk a ca uk a yoih awn va ngui a daa gah ca pyein man ca kya ci. Robert cu a kya ah a ming thang ciah Khanpughi ah ng’thu guk nak ah ca uk gui phih a k’daa guk ciah kya ci. Bä ca Robert Bellarmine Christu kum (1598) Pyaghaleihma lah k’kokipleighüit ung Cardinal kia lo khai ah ghü u hleih a cunung ka noh leng ne Trent Council ah thühla, chü chah gui bi lo ne om ca kya ci. a ni cu Vatican Manggio ung hlüngtai nak gnün awn om tu panglang ne phih m’thut lah hlubok hta düt ei neh yaica duding ki gui am peihtak ci.