A phu om ca “Aching”
A ching ci cuh k’chang tumat kavai aphu ak’däm pi-ah khoh tumat-ah kia ci. A ching ak’ni-ah mang thei ca k’chang-ah phäh cuh ng’yäk ng’chan nak vai hngu ma khai kia ci. A ching kä mang tu thei ci cuh van-ah hngu-ah k’poih ghüt khai-ah kia ci.Tuh chü aching cuh ak’ni-ah mang hnging vai-ah ma mong gui guk nak-ah ca uk gui(memo) phih om lo ca kia ci. Cun gui-awn bi püi gui lah bi vai gui cuh ng’chüp hleih guk then neh bi lo hnging -ah kia ci. A ching ng’büh khai kä mang tu hnging ci gui cuh a hngei gui ami hlüng tai lo dan neh a om nak cheng geng-ung om khai-ah kia ci. Shüm khawk lah pum vi-ah dong ng’tam nak cuh ming ya tumat ci. Pum vi cuh dong gai tu pang neh phih a ih nak-awn a ching cuh k’hmaih hleih kyäp-ah hteit ca shüm khawk noh ma ta neh bü nak-ah gok ma ci.
Cun-ah hlo-ah kho k’chang ng’bum-ung phih ng’thei ng’tham hnguh hmat neh, khoh cham mah neh kia-ung phih ih düt neh abi kä k’tha nek ci cuh kä ng’yäk ng’chang hloit khai. Du khaih tu lang neh ama mong m’htei neh k’tha nak ci cuh ng’yäk ng’chang khai cuh k’cheng ci. Mi pigo mo mang go-ung phih mi teng shüm ko. A k’hngüp täi hleih ng’chüi neh a ma mong bi ci cuh ng’yäk ng’chang lo ci cuh mi hnguh hnging khai-ah kia ci.K’chang cuh a du a ng’mang cuh i kä kia ci. A mät-ah k’tha nak-ah ci-ah gah ca kia ci. A m’shah cuh anu pa ng’büh ng’mang hleih ng’mang ci aom-ah hlo-ah amät-ah k’tha nak-ah ci-ah ng’mang ci phih da ci. Shin gui cuh kho m’dek khan kavai gui pyein-ah kia ci.
Cun-ah hlo-ah ngoi-ah shi kon-ah kavai phih cun-ah hlo-ah k’tha nak vai hlü ci. Shih lo-ung ak’ni nak gok tu vai phih k’tha nak vai hlü ci. Tuh chü leng neh ak’ni bi loh nak gui, ng’khai ng’lang nak gui, suh shan nak gui cuh aching gut neh bi vai hlü ci.Kei noh tu k’bäih i tah ni khai ka bi hnging khai-ang ci neh ak’cum-ah ng’ngaih tüh vai hlü ci.
Cung phih k’chang van ghep noh kyäp kyäp-ah bäi khai ci neh ng’ngaih-ah m’lung noh ana m’shok shü gui cuh mi hnguh hnging khai-ah kia ci.Kyäp kyäp-ah bäi khai, aching om ca mo ci-ah m’lung noh cuh kho m’dek khan-ah phäh phih kyai, ngoi-ah shih lo-ung kavai-ah phih kyai vuuk kat nak pe hnging ca kia ci.
A ching cuh mät noh mät kah gut neh kho m’dek khan kavai bi-ah hlo-ah ngoi-ah shih kon-ah ng’mü m’cha kavai cun phih bi vai hlü ci-ah mong cuh a ching-ah aphu a düm-ah mong cuh van noh hmat neh mi k’tha na yop ko.
