Bä ciah Cornelius lah Cyprian ah ghünlu a mòng

Bä ciah Cornelius cu Christu kum 251 ung Emperor Decius no yumtu ng’bum a yo k’kaa nak yah ung Papa Shangpughang ah a mi ghü ah kya ci. Papa Shangpughang ah a kya lo nak kä shop ha hleih Africa ghunkhaw ung yum nak lam ung dídam lo ci gui ah ng’lak ah ng’cuh ng’gein nak om lo ciah kya ci. A mi yum nak nong ne Catholic yumtung’bum nong ghüt ci gui k’chang gui a m’sha Boiphaya gui no yumtung’bum ung ka no a mi nong hlü te ngami gui ng’yu ba ne Catholic yum nak ung a mi lo ba hlü ah a kya ung a mi do ba gui vai ah Carthage Taigü Mâng Cyprian pyein hleih a cun ah k’nga phlang nak cu Papa Shangpughang no ng’ngai ne do ba gui khai ah a m’lung phukpit hleih Novatian no Papa Shangpughang ah bi vai cu kä k’bäi ne a mät no a mät Papa Shangpughang ng’hngu ng’tuk püi ciah k’chang ah a ci ah kya ci. A ni cu yumtu ng’bum ah ngoiä shüm lä vai gui ung maapi k’bäih ne Papa Shangpughang ng’hngu nng’tuk püi ciah k’chang tumat ah kya ci. A cun ah kya hleih yumtu ng’bum ung ka no a mi k’täm ah kya ci. cunt u pang ah phih a ni no khong mang ne a bi gui cu a k’sho om lä ciah kya ci.

Christu kum 253 ung Imperor Shangpughang Gallus yumtu ng’bum a kya ah a k’kalu nak ba ah kya ci. Cornelius cu khophung got täm u hleih a cun ung a kya ah duyai coi ga ne shih ciah kya ci. A k’hngu ah a ni ah gok cu la ba ne St. Calistus  m’cüm hngün ung a mi k’phon ba ah kya ci. A cun ung ka no kho kum k’hma be lo hleih Bä ciah Cyprian no Boi Yesu a m’hngi nak ng’dang lo ba ciah kya ci. Shangpughang Calarius Maxi no Cyprian am a ni ah hlüngtai nak ah k’kaa ah ka no Shangpughang cu a m’shümchuk vai ah pyein hleih Cyprian no Shangpughang am a pyein ba cu cang lam ah phäh ah a kya ung a í ng’ngahtüh vai kä om khai ci ne pyein hleih Shangpughang no Cyprian k’chim awn a mi ngon vai ah pyein ci. Shanpughang no a cun ah a pyein a ng’yak vail ah Cyprian cu Khanpughi m’tam ne kya ci. A cun ung Christian gui ah ng’lak ah a kya ah m’läng khang k’pam cai lo ne Cyprian ah hngu läk tu ci gui cu a k’daa a ni ah hngu ah läk ci gui ah kya ci. Cun kon ah a ni ngon khai ah k’chang am ghui ng’lung 25 pe ne ta kä mi ngon pha ung m’khuk khu dong ne k’taigü ciah kya ci. Cyprian cang lam ah phäh ah a hngun a peit kon ah kä shop ha hleih a ni ngon hlak gui ciah Shanpughang   cun phih shih ciah kya ci.