Kho K’nget-ah M’hling

Kho k’hngüp ät-ung kho k’nget ng’vai cuh a ngoh nak-ung ngüp neh k’chang gui avan m’htei kho-ah ami gok lo hnging vai cuh ng’ngah tüh ci. A k’hngu-ah amät noh kä ng’ngah tüh lo ba hning neh kho k’nget k’hmo gui chü gui neh ng’ge püi gui ci. A van kyüm lo u  hleih leng neh a pyein cuh “na mi hmat-ei-ah mikmi-ah ma mong cuh k’chang gui avan khanmopi-ah kä mi gok vai lah mi om nak m’htei kho-ah ami gok lo vai-ah kia ci.” ci neh pyein ci. Na mi ng’ngaih gui pyein tu vä ci hleih kho k’nget tumat noh “k’khanmopi cuh kä om ci. Khanmopi-ah gok nak hnging vai-ah om kya k’ni phih kä om ci ci neh tawk tap gui-ung sha gok lo yop khai gui .”ci neh k’chü taih hleih ng’ge lo ci gui. K’hanmopi cuh om ca van noh ahmat pi kä om ci ci vai phih u noh kä yum  khai ci neh cun-ah k’chü a taih cuh k’hlet ci gui. K’chang gui-ung ak’ni bi hlü ca m’lung ng’ngaih cun phih ami ng’tüi lo yah ge-ung om ca kia neh ak’she bäng bäng ami bi vai ci gui-ung kä gah vai ci neh ng’ge lo bai ci gui.

     Cun kon-ah tumat noh ng’düi lo neh m’htei kho kä om ci ci neh tawk gui-ung mä. K’chang gui-ung k’she bi hlü ci gui-ah ng’tüi püi-ah m’lung ng’ngaih om ci  ci neh k’chü taih hleih ng’ge ba ci gui. Cun phih kä gah khai k’chang gui van noh m’htei kho om hleih hmat pi ci gui. Cu tah leng neh ca pyein vai kä ng’hloi khai ci neh chah ba ci gui.

     Cun yah-ung tumat noh ng’düi lo neh  kyäp kyäp-ah gah khai ci neh tawk tap gui-ung mä ci neh k’chü taih tu hleih  ng’ge lo ba ci gui. K’chang gui noh ak’ni ami bi hlü-ung phih ai om cang hlä kyäp kyäp-ah gah khai ci neh ami ng’ngaih lo-ung ng’düm lo cang khai gui. Kat nak bi vai neh ami pong lo-ung phih ai kyäp kyäp-ah gah khai  tu k’bäih hta lei ka bi ba cang khai, ngong cituh bo ci neh ng’shong ng’phyat lo khai gui ci neh k’chü a taih cuh van noh yum neh äi ci gui.

      Cun-ah kia hleih  kyäp kyäp-ah gah khai ngong cituh bo ci  neh ng’shong ng’phyat nak gui cuh kho k’nget-ah ak’ni pi-ah ng’däk nak-ah kia ci.

       Cun kon-ah kho k’nget ahngei gui noh phih keimi noh shi hla hmawng cang nak cuh mang neh kami tawk gui te m’htei kho-ah k’chang ak’da kami gah lo ci ci neh pyein ci gui.

       A m’shah noh m’lung m’däm nak cuh mang neh k’chang ak’da kami khah lo püi hnging ci, ci ki gui.

      A m’shah noh ng’u ng’tak nak mang neh k’chang gui ak’da kami khah lo püi hnging ci ci u hleih ami ng’vai hta cuh yei tu ci.

  Cun gui-ah tah ami ng’vai hta noh ayum tu pi cuh kat nak cuh kat nak-ah kä kya ci ci neh ka tawk gui te ng’nong lo ci gui ci neh pyein hleih ami ng’vai hta noh suh ak’da pe neh m’tam ci.

Mikmi gui phih a k’hngät kat nak cuh van noh bi hleih kat nak vai hlü bä kä kya ba hleih bi tu-ung gah khai ci neh mi ng’ngai hnging ca kya ci.

   Cung phih kat nak cuh kat nak-ah hmat neh k’chen phyak ci k’chen neh hloi phyak ci hloi neh mi om tu hnging vai cuh hlü ci.