October k’cha ung Papa Shangpughang no a bi vai gui

Cardinal Robert Francis Prevost cu Papa Shangpughang Leo 14 ah kya ne yumtu ng’bum a kho mang nak k’cha k’phli lo lo ciah kya ci. Tuhchü ah chüt hleih a ni cu Italy ghunkho ung om ne ghunkho mong gui, yum nak lam gui lah kho m’dek k’chang gui lam ung hlü ci gui cu bi lo ne om ciah kya ci. Christu kum 2024 December k’cha ung ka no leng ne 2026 January ah chüt hleih a ni no a bi loh vai gui a pyantham cu om ciah kya ci. Lo k’khai ah October k’cha Jubilee awn seng hleih abi vai gui cu pein lo ciah kya ci. October 5, kyün hngüp ung Khom’dek pum ung om ne Khanpughi ah mong lam bi ci gui lah a kho hei ah ng’plon ne yaica gein vai ci gui ka vai ah Missa gänap ne ci khai ah kya ci. October 9 hngüp ung Evengelical Council ciah Khanpughi ah maa ah  ng’gun nak awn a mi ghünlu gänap ci gui ah Jubilee Missa gänap khai ah kya ci. October 12 kyün hngüp ung Nu Maria ah thei tu ne a ni ah läk lam gui läk ne a mi ghünlu m’htei ci gui ka vai ah Missa gänap khai ah kya ci. October 19 kyün nghüp ung Kho m’dek pum ung Khanpughi ah mong lam bi ne a mi ghünlu gänap ci gui ah k’hngüp ah kya hleih a cun k’hngüp ung Bä ciah k’chang gui 7 Bä ciah k’chang ah kya lo ci ci cu k’kho m’dek pum no a hmat vai ah m’thein khan khai ah kya ci. October 26 kyün hngüp ung yum nak gui a hei hei ung ka kho mong k’chang gui awn ng’hnguh ne ng’hta ko nak ah missa gänap khai ah kya ci. October 27 ung St. Peter Pasilica ung htekkahto kyawng htu kyawng hta gui awn a tang ah Missa gänap khai ci cu na m’thein lo tu gui ciah kya ci.

Source: Vatican News