Viterbo Mânggo ung ka Bä caih Rose ah ghünlu a mòng

Bä caih Rose cu Christu kum 1234 ung Italy ghunkhaw, Viterbo Mânggo ung ka no ng’tüi ciah kya ci. A k’hmo hta yah ung ka no leng ne a k’ni ah Khanpughi yum äp ne kya ci. A kho kum 8 ung a ni cu a kya ah goi pyam ne a kya yah ung thuuk ne cäicat vai ah ng’kho cu buiawt ciah kya ci. A ni ah ng’tüi nak ah Mânggo ung om ciah lam m’tung khan ah a ni ah Khanpughi awn a ni ng’hnguh ng’hmat lo ah mong gui cu m’dang ne pyein ciah kya ci. A ni cu ghunkhaw mong ung yaica nak gui buiawt ciah Papa Shangpughang a phäh ah a ni ah ng’thu k’thai gui cu gunhtot nak tumat ah kya lo ci. A ni cu Lam ah k’khan ah Khanpughi ah mong lam gui thähla ne a m’thei m’thang cu kho kum goi peng peng bi ciah kya ci. A cun ah a bi cu Papa Shangpughang ng’hngu ng’tuk püi ci gui no a ni Rose cu Khanpughi ah mong lam thähla m’thei m’thang ciah kä kya ci. Ghunkho lam ung kä cang a m’di m’dam hlü ci ne k’puk u ne ta Viterbo ung ka a ng’vai (vonkyi) no ghunkho k’täm ne, a nu lah a pa phih Soriano Mânggo ung a ng’plon hlak goi ah kya ci.

Mâng im Shanpughang a k’hngih nak Frederick a shi kon ah Rose no lam ah k’khan ah ka no Khanpughi ah mong lam a m’thei m’thang ah phäh ah Papa Shangpughang awn kä mi ng’gei nak gui cun phih ng’päng ne kä om ba ciah kya ci. A ni ah NuPa k’tu cun phih a k’ni ah dímgei hleih a mi im ah lo ba ci gui ah kya ci. A cun kon ah Rose cu St. Mary phaya kyawng ung om ciah duyai ciah Clate Mamah ng’htoi un glut tu khai ah k’tha na ciah kya ci. Cun tu pang ah phih a cun un guk ciah Mamah a ng’vai gui no a ni a luh tu vai ah kä k’bäi ci gui ah kya ci. A kho kum 18 va lo pha ne shi hleih Podio Mânggo ung om ciah Santa Maria kyawng ung a mi k’phuh ah kya ci. A cun ung ka no kho kum k’hma sho lo hleih a mi k’phuh nak ung ka no la ba ne ta Christu kum 1252, Sepember k’cha 4 ung St. Mary of the roses Mamah kyawng ah k’plon ne a mi k’phuh ba ah kya ci.