A-hlu-läk k’phlì, chü ci.
Cun zah ung Genesareth tuilì-’kam -ah, a ng’düih zah ung k’chàng a k’dá nawh Báwi-ah m’thei m’cäi ami ng’ngaih, ami ng’zák tu vai-a phäh-ah, Jesu ami k’búi lo zah ung tui-’kàm-ung, ng’hlè-kõ k’hngih om hleih hnguh ci. Ngá-k’sùi gùi nawh ng’hlè-’kõ-ung-kah kium lo neh ami ng’vài m’si neh om ci gùi. Jesu nawh Simon-ah ng’hlè-’kõ ung kài nehtah ng’hlè-’kõ cuh, tui’kam-ah m’hläih hlak ci. Cun kon-ah ng’hlè-’kõ ’khãn-ah ngoh neh tui ’kam-ah ng’bum ci-ah k’chàng gùi àm m’thei lo gùi ci. A k’chü a ng’päng lo kon-ah, Simon-àm piéin neh “Tui a lìnák tu bà zah-ah hläih nehtah ng’vài-awn vòi neh ngá pha vä,” ci neh piéin ci. Simon nawh phih, “Báwi aw, keimi nawh mü púm k’thánák u neh phih, i kä kami pha ci. Cun-ung phih, Báwi nawh a piéin a hlo-ah, ng’vài ka vòi khai néi,” ci neh m’sàng bà ci. A cun-ah vòi u chüt-ah ng’vài ték ghep ghep khai ah, ngá a ng’um pha ci gùi. Ng’Hlè-’kõ a hei-ung, om te ci gùi-ah ami po chàng gùi, lo neh ami gung lo tu gùi vai ah, väk tu gùi ci gùi. Ngami cun phih lo tu u neh ng’hlè-’kõ goi cuh, m’dit ghep ghep khai ah, ngá bé hleih m’chäp ci gùi.Cun cuh Simon Petru nawh hnguh nehtah Jesu-ah khaw kung-ah ng’bóp htá neh “Báwi-aw, kei cuh, kat a k’dá ka bi ci-ah kia ci. Kei-a kah hteit bà-ä,” ci neh piéin ci. A i-ah kia hleih ci ung a mät lah bi tu ät te ci gùi avan cuh ngá sin k’chü ami pha lo te-a phäh-ah, Simon-ah pó goi-ah kia ci-ah, Zebèidèi-ah htá goi, Jacob lah Johan phih, cäi cãt te ci gùi. Jesu nawh Simon-àm m’sàng bà neh kä kiü èin-ä. Nang cuh tuh-bäih lèng neh k’chàng pha’ci-ah ng’vài k’vòi-ah na kia lo khai” ci neh piéin ci. Acu vai-àm, ami ng’hlè-’kõ goi ni, om ci phung avan tui-’kam ah nawng ghüt u neh Báwi läk tu ci gùi.
Bawi noh Simon, John lah James gui chü gui neh ” Nang mi tukbäih ung kanoh k’chang phak ca k’chang a nami kya khai” ci neh pyein na gui ci. Nga bäng vah shüi thei ci gui cuh Bawi noh a i kya hleih ang a chü gui? Ng’ngah tüh vai kya ci. Ngami gui cuh Nga vah shü ci gui, a hoi ah nga om khai, a hoi ah a i hok cha shui vai hmat lang u neh phih Bawi noh m’kha ät hta a pyein na phäh ah bi u hleih nga a k’da gah ci gui ah kya ci. Bawi ah k’chü ng’ngai ci gui. Bawi yum ci gui a kya hleih Bawi noh a chü gui a kya ci. Mi hmat ca mi ng’ngaih ung Bawi ah chü mi ng’ngai hnging khai ang? Bawi ah k’chü ung m’yung-aa om ci mi hmat vai khin ci.
