Kchò Catholic gui ah màmòòng
Htum Kchòkhò ung phih kyai,Hlíp Kchòkhò ung phih kyai Khòilung Pìgò ngcut Lung Kshé Parish ah tah mà tu ba neh Catholic Htahtana on atäng ah om lo ci kä om ci. Lo khai ah kum 2034 ung RC a gok lo nak cuh kum 100 bé lo khai kya ci.Htahtana lo neh mdüih lo htük ca Pyinhtit Htahtana kbî gui noh khòkum mkù ghà hlok ung ami bi hnging gui mi teng ah akya ung kum 70 hlok ung mikmi noh i ang mi bi gui a om mhteih neh mi teng shüm ko? Pyînhtit htahtana kbî gui cuh khòkum ät gôi am mi kchî hmat ci gui. A pí ah phih käh mi ngyák tu man ah kchî,a i ah phih kä nghlôi tu láng pâng hleih phih nghlôi guih guih khai ami kthának on hmat líng ci gui. Tuhchü mikmi cuh mi mät ah kchî hngô akní ah kä mi pyéin lo ba thêi ci. Ami pyéin thêi bäng ah kä kya neh Kchò Kchî ung ka noh Ingkalik Kchî ah na kphlàn pe gui neh Dictionary na pyân pe gui ghüt u hleih akcêi teng neh kkhêi phat tu khai hngô kä dá ci.
Ami gok lo lah khòtûi khò k’â mhtéi neh mdek kä ngmin en khai kpang khai ci neh shing gui géit ci gui. Mikmi cuh shingghìng géit vai pyéin k’èi a k’om pyi mi chudèng laih laih u ci hleih khòghàm gui kpú lo neh mdek ngmin lo ci.Khò kpú lo ca kya neh khò käng lo ci. Khò käng lo neh géitkò kä ong ngtang ba ci.Tuhchü mih-mik Kchò gui cuh a päng hngu hmat lo tu ci gui dá lo tu pang láng hleih phih ca kä ngthêi màn ca mi pùghí pa gui hlok hngô ah mi ghin om vai kä mi hmat ci. Pùghí pá gui cuh a i phih kä ngthêi ci gui te cuh lòng phlèng neh vók ung lòngyûng ngmin lo khai ci neh lòngyûng nong laih laih u hleih lòngyûng päng ung lòng shing ktài gui bé neh kphyú kkhâ,yòng,hòi,k’hluk gui acun gui ung yèikyài neh ghìng om ci gui. Khòpùi ghàm khai thà u hleih khò khò k’â ni neh acun ah ghàm ung kphyú kkhá khìhlá dá neh coh ngphlài nak gui vai phih om neh shing mhtàì nak vai phih nghlôi màn te ci.
Ca mi ngthêi cuh mi ghinlù ung kä mi mang thêi ci.Pyinhtit htahtana kbî gui noh i kä hmat u hleih ami kshé nak man ah mi pùghí,pìghí hngô noh ana kshé nak tu ba kshòn gui vai ah kä mi thu khak ci. Pyînhtit Bóiphàyà Jordan no mi thùngyò,mi géitkò,mi nglêikhò,mi pakkhúi na guk thén pe gui ci. Cun cuh kphlàng hnging ci noh phih kä kplàn hlot phùng laih laih ci. Tuhkbäih akkà pí cuh akdá pí noh a pùghí pìghí hngô kä hmat ci gui.Ami pakkhúi ngshòn ami kkhêi tu hnging vai läí cuh kä pyéin tu líng vai.Mvákhò ah mòòng kyawng ung lälä hleih kyawng kkài gui noh kkhêi phat tu laih ci gui. Kchòkhò ah mòòng kä hmat ci gui. Yankone ah mòòng ca gu neh mi teng laih laih ci. Mi pìgò ah mòòng kä mi hmat ci.Acun gui ah a kchòkhò púm ah mi ghóighap cuh mikmi RC noh htahtana kbî gui thêi bang tu u neh mi ngthong nghlah vai hlü ci.
Ngmùi mchà ah hngùn ngdün ghinnak ami na mthêi chûi hlô gui ah kphêi ah khòmdek lam täng ah phih hnguh hmat biloh a hlüng tài vai ami na khòngmàng gui ah hlô ahkä mi kphâ tu gui ung phih ngphâ hnging hlok ah ah apí ah akya ung bo tah lèng neh mi bi lo tu kò. Ngthûkní ung Kkhânpùghí ah ngshòn phih mi kkhêi tu hnging u neh mi mät ah ngshòn htung pakkhúi phih mi hmat vai mi ci tu kò.Israel ghunkhò ah mòòng phih mi kshíng tu u neh mi pìgò ngdühngün ah hngün mòòng phih mi ktäih tu vai khîn kkà ci.Kä cun ah akya läí ung mikmi cuh kchàng om nglak düt ah mi kya khai ahPyînhtìt htâhtanâ kbî gui noh na mthêi gui ci. Tuhchü cuh mi pùghí pá gui ah hlô ah mi nú pá gui noh mi ngshòhtung pakkhúi cuh kä kkhêi ba hnging ci gui. Cun tu pâng ah phih mi pìgò pakkhúi phäh phäh ung om ci gui no ami mchüt hnging hlok ah mcut neh mi guk ah a kya ung aguì akén ung phih mi hta nà gui noh ami mgòng pyéin tu vai om khai kya ci.
Pakkhúi tumat noh kyawng kkài tumat noh akkên chüm ngshòn khmà kchuk,a mchüt hnging ung ngshòn kkô ghà a tän kkhêi hnging ung ni tu ba khai. Aknî pí läi cuh Mvàkhò ah pong neh ngdüí lo ca Kchò pùghí ung ka noh lèng neh kkhêi hnging ci cuh bä khai kya ci. Avaihlü ah tûilì kchàng gui ah pùghí Kchò Näng Mâng cuh Mvákhò ah ka no lo ci.Kkyünhtá Pakkhúi ung kah Saya Khò Gêi Nglìng noh acun ah kkhêi neh a guk cuh hnguh hnging ah kya ci.Hngáhtá ung phih acun ah ngtäp hleih kkhêi ba hnging vai ah mcùt ba vai kya ci. Ka mät Saya Om Päng hngô ngshòn kkô ghà vah ka kkhêi hnging ca kya ci. Ka nú Ghìng Nglìng Nglên cuh acun ah ngshòn lo ung hlèi lah khngái thà neh lung mshòng kpong nglìng neh om lo mòòng pyéin neh a ng’äî cuh”Ngshîm lah nggá ahnglak lam mhlàm cikkâpi kbùi onngthôn ei ci. Pùpí khtük ung Nglùng Yò kcê HngáGhíng pùghí angshùng khngîm ci.
Khtù kûng kshùng ungNglùng Om Ngthàng Nängkhò hlân ghíng kamvùi lüt ci. Kkhúi ngshòn coih ungkkhúi thung Nglìng MòòngKkhêi Ngthàng Om ahngshòn thô hleihKkhêi Ngthàng Om ahngshòn khtù thoh ung mäNglìng Ngái lah Om Ghí Om Kyüì Gok ahpá ngtän ci. Pá mdóng lüng ungngbe kshé khtù hlùiKyûì Gok Om ahmâng ngshàng eìKyüì Gok Om ahmâng khìn kvôi ung mäNglìng Kyüì Nün Ghìngah ngphyék ba. Nglìng Kyüì lah NünGhìng Kyüì Nün lahNgthàng Hngá Mvùi ktùngtüilì neh ngmäí lo. Hngá Nglìng lah Hngá Nglòmâng thòn ngcoih hleihkkhúishing hlùm pyùngneh ngthot ba.Ghíng pong htük ungngkhêi htung shäm ghùicìng khngái ngthèihlei nák ei. Kkhá m’yä hlân ungngshòn gûi shän neisùilèi phya ngnònghêi màn vü.”Kchò gui cuh kkhúishüi ngshôn kkhêi ami pyéin lo ung pùghí pá ah ng’äî ng’om màn gui ng’äî ba neh om màn ca kya hleihKchò kchî kthúk gui shùilèi hnguh hmat neh mi htahta lah mi hngün mòòng mi mdáng tu khîn ci nei.
