Pâhtâ mòòng nghtàngkònak
Pâhtâ mòòng nghtàngkò lo ung avan noh ät neh ngyungnak om ci.Cun ah ät nak cuh Catholic Christian gui noh a khngüp tä hleih ktàigü mcûnak ung bòi khenggeng ca Kkhânpùghí ah mcäì mòòng ghà ah kya ci. Acun ah a mcäì mòòng ghà cuh akcàng ah pyéin ung a pakkhúi päng ung om ci. A i ah kya hleih ci ung Kkhânpùghí cuh a pakkhúi päng bäng ung kä kya neh kchàng päng ung om neh ni kshé mchâmlàngnak ah lùkchók lah mlùng khnà na pe gui ci. Avaihlü ah kchàng päng noh mgúk kä ni ci. Kä mgúk vai ciah a ngtüîpüî gé ah a hmat vai ah hnguh hmat nak cuh Kkhânpùghí noh pe ci. A kchàng päng hngô am a péit ah kya neh a pakkhúi päng ung läk vai lah yeh hlôi nak gui om lo ci.Kchò thùng ah hlôi yeh nak gui akkhak om ci. Avaihlü ah lam kä khang vai. K’hlòigò kä tuk vai.K’hlòigò tuk ci a kkhúi cìn ci.
Pùpì lam khang ci a hngùn thet ci. pa htung bäng om ba ci a phù kä shui vai.Ngón ba ci mät cìn ci. Khò nggî kä hlô vai. Pùkhò kä mthûi vai. A pù mthûi ci a htalê pím ci.Shé nglung m’yok ci a ghêi hmò ci. Cun bäng ah kä kya neh mü ah kä mshûk vai. Géit shui yah ung kä mshûk vai.Kä vûkhôn vai. Kchàng hêi gui ah eî ôk tu ung ngngaih düt ah kä êi ôk tu vai. Kchî kä mdá vai.Ngngaih na neh kchî kkyô vai.Tûilong ung kä ék kphyám vai ciah akkhak lènglèng ah ami htanà ami mcäìnak gui om ci. A shin ah hlô ah hlôiyeh nak gui cuh a pakkhúi päng ung om ci. Cun gui ah a ngchüpnak gui cuh pâhtâ kdäm gui ung om lo ci.Pâhtâ yùmnak gui akkhak om tu pâng láng hleih phih khòmdek ah kkhân ah pâhtâ aktúng pí kphlì vah om ci. Pâhtâ akdäm pí kphlì ung ah kya ca Christian,Islam,Hindu,Budha ung phih Kkhânpùghí ah mcäì ami guk gui cuh a pakkhúi päng ung hlôiyeh nak gui a ngchüpnak ah va kya ci.
Avaihlü ah nú pú lah ngvái tu ba ci gui hlûitä vai ci cuh pâhtâ noh kä mthêi ung phih mghûngthâ ca. pakkhúi gui no phih mthêi ci. Cun ah hlôiyeh nak gui ah ngchüp nak gui ung kah Christian ah mcäì nak gui teng ung Kkhânpùghí bäng mshùmmchuk neh ani cuh na yùm mhngî tu pí vai ci cuh chà tu hngá ca läk vai tumat ah kya lo ci. Kchò gui cuh khò päng yùm ci gui. Pùshihpí Kkhânpùghí phih yùm ci gui. Cun tu pâng ah phih Kkhânpùghí ah mcäì ci cuh kä hmat màn ci gui.Kkhânpùghí a om yùm tê ci gui cuh akní ah kä hmat neh ami om yah ung mthêimthàng gui ca RC htahtana gok lo hleih Kchò thùng on mcoih neh Kkhânpùghí yùm lo ci gui.RC ah hlô ah kä mgúk vai. Kä hlê vai.Kä plet vai ciah mcäì ca pâhtâ kdäm gui ung kah Kchòkhò ung Budha cuh mi teng ah akya ung mghûngthâ on kcô ci gui. Ami yùm cuh avan täng ca ngngài ci gui. Mghû ngthâ bà shüm neh phungki kyawng ah hteit bà shüm neh ami kya cuh akcàng ah Budha ah mthêi mcäì yùm gui kä hmat neh ami kcôkhalòm ah kya ci.
Ani ah mthêi mcäì nak ung kä om ci.Khò am mghûngthâ phih kä yùm ci.Akshé apí ah phih mlùng ung kä om en khai ghin om ung kä ni ca ghin om nak ung kah noh maih vai. Ghin om nak ci cuh akshé bi ah phäh ah ci ah mthêi ci. Cun ung Kchò thùng ah nú noh a ng’äî nak ung”Shihpí ah tüîlí mik htí hleihkìmmkôi letyéihei kkhêi nehKhò ghun ah mcäîcòng ngnyan om nehna thùyá khängghämghäm ci.Shihpí nú nohã tüî kä cùmã mcäì kä ngpänghngá kyäm ci. Pùshihpí nohmyung ung a péita mcäì tah ngpängghämghäm ci”Khò ni Kkhânpùghí ni kcò kphyót neh yùm mán te ca Kchò gui Catholic ah ami kya lo cuh ami Kchò thùng màn gui cuh Bói Jesu Kkhânpùghí täng ah mhlat neh (Inculturation) bi ah kya lo ci.
