Arimathea Mânggo ung ka Joseph lah Nicodemus ah ghünlu a mong
Arimathea Mânggo cu a hoi om ci ci a u no phih a k’ni ah kä k’shing ciah kya ci. A pigo awn m’toi ne a ng’ming a mi m’dang cu ng’thu k’ni ung a hei Joseph awn m’cha ne a mi k’shing vai ah phäh ah kya ci. Ng’thu k’ni ung a ni cu a m’lung ni ne ng’shunghei ciah k’chang tumat ah ng’dang ciah kya ci. A ni cu Sanhedrin ng’htoi ung ka tumat ah kya hleih k’chang gui no a mi m’nai tu ah k’chang ng’vai tumat ah kya ci. Joseph cu a ng’tüi nak ung ka no lut lo ne k’chang gui no a mi yum m’nai tu ah chüt hleih Jerusalem ung om a k’sho om ciah kya ci. Duyai k’chang gui a k’daa a mi om nak ung om ciah kya hleih a ni cu ngami ah ta ng’bühng’mang tub a ciah kya ci. A ni ah khotang gui a van cu a mi mânggo a mi ng’vong nak vai ung a mang ah kya ci. A mät ah ng’vong kyong ah a k’ni ah khäng htek ciah ukku tumat a pyan ah kya ci.
A ni cu Missiah Boi a kyum lo vai cu äp ne ng’äih ciah k’chang tumat ah kya ci. Nazareth Mânggo k’chang Yesu a mòng no a ni ah m’lung k’nga cu k’däk caih kya ci. Khanpuhgi cu Boiyesu awn a täng ah om ciah kä kya ung a ni no a bi gui a í phih kä ng’päng hnging khai ci ne yum ci. Boi Yesu cu k’pyhon ciah Boi ah kya ci ci cu a cang ah yum ciah kya ci. A ni cu k’chang gui no kä mi hmat ein vai ah Boi Yesu ah hngu ah düm hta ah läk tu ciah kya ci. A yum nak cun phih thup hta ne kä ng’dang ein khai ah ci ciah kya ci. Boi Yesu ah khan ah a ni ah yum nak gui cun phih a ni ah teihpüi pokk’chang a u am phih kä m’thein tu man ciah kya ci. A cun ah a om cu k’chang gui no a ni ah yum nak ah phäh ah a í ah boh a mi kyak nak vai kyü ne ng’ngaih na ne om ciah kya ci.
Boi Yesu shing m’kang k’tung ung kyang ne a mi ngon nak cu Joseph ah k’cham awn a ng’et hta ah kya ci. A cun yah ung Josep cu a k’tha be ne gai lo ne Pilat ah om nak ah kä kyüh ein ne lut ne a mät no amät a u ci ne m’dang ne pyein ne Boi Yesu ah a gok cu a shan gui ah kya ci. A ghnun kä om ba ciah Yesua ah phäh ah a chü a chah peit vai k’äih ciah Josep teng ne Pilat cu a kya ah cäi ciah kya ci. Boi Yesu ah a gok gah lo ne a cun hteh püi ne ta a mät ka vai ah a pyan ah ukku ung Boi Jesu cu a ghon ah kya ci. Kä cun vai hlü ung Boi Yesu ah gok cu m’guk ei goi vai hlü ah bikboi gui a mi ghon nak ung ghon düt khai gui hlü ah kya ci. A cun ah Josep no a k’ni hta ah Boi Yesu ah gok a k’phuh ah kya hleih Arimatea Mânggo k’chang Joseph ah k’cham ung ka no Boi Yesu cu ghünlo ba ciah kya ci.
Nicodemus cun phih Boi Yesu ah hngu ah düm hta h läk ciah k’chang tumat ah kya ne kä kya hnging khai gui phih k’tha na ne bi ciah k’chang tumat ah kya ci. A ni cu Pharisiu tumata ah kya ne mät ah pakkhui m’hngi nak ung nga tu pi ne yum nak ung m’hteng ciah läklam gui läk ne om ciah Judea k’chang ng’htoi ung ka tumat ah kya ci. A ni cu Boi Yesu ung om ciah cang ne ni ci gui a m’sha cu a k’ni ah k’shing ciah kya ci. Ng’thu k’ni ung Nicodemus a mong a mi m’dang nak ung a ni cu Boi Yesu ah om nak ah k’chang gui no kä mi hmat ein vai ah Boi Yesu hteit ne ng’hta püi ci ci ne om ci. A ni cu Boi Yesu awn a kya ah ng’hta ng’ko hlü te ci. A teihpüi gui no a mi hmat vai phih kä ng’yak hlü ciah kya ci. Boi Yesu no Nicodemus am a k’thai ah a ng’tüi ba vai ah a pyein cu a k’ni ah ng’cha hleih pyein ciah kya ci. Cun kon ah a ni ah yum nak cu a k’ni ah m’dang ne a ci vai ah pyein ci.
A cun ah mü nu ah Boi Yesu hteit ne a hnguh kon ah Nicodemus cu a m’lung kä kyäp hleih hteit ba ciah kya ci. A ni no Boi Yesu hteit ne a hnguh cu ng’hta ng’ko vai kyat e ci Boi Yesu no a ni a ng’ngaih vai lah a m’lung a k’ni ah ng’chak khai ah a phukpit vai ah pyein ci. A cun kon ah k’cha a pi a sho kon ah Boi Yesu cu Jerusalem ah hteit ba hleih a ni ng’hngu ng’tuk püi ci a hlü hlü a mi kya nak cu däm lo pi hti ciah kya ci. A ng’lak ung om ne a hon lam ma phih kä k’bäi tu hnging ciah Nicodemus cu a kya ah a ng’ngaih khak lo ciah kya ci. A í ah a kya ung phih Nicodemus cu Joseph awn a täng ah a ni ng’ngaih ät hleih Boi Yesu yum ne a hngu ah läk ci goi ah Bä ciah k’chang goi ah kya ci ci cu ng’thu k’ni ung ng’dang ciah kya ci.
