Tui k’phùm Johan a k’hngü m’chüm neh ami ngáwn-ah màwng.
Sangpùghang Herod nawh a nàü Philippu-ah k’chú, Herodia cuh, gut neh om tu bà püi nehtah Tui k’phùm Johan cuh, pha hlak gùi neh thong ung a chúm hlak gùi. A i-ah kia hleih ci ung Tui k’phùm Johan nawh na nàü-ah k’chú na guh vai-ah kä kia ci, ci neh Herod àm piéin te ci. Cun-ah kia-hleih Herodia nawh Tui k’phùm Johan cuh, ú neh ngáwn hlü ci. Cun tu pang-ah phih, Tui k’phùm Johan, k’chàng k’ní-ah a kia cuh, hmat neh Herod nawh m’htéi hleih kä ci hlot ci. Herod nawh Tui k’phùm Johan cuh, kiüh-à neh a piéin phung ng’za nehtah a i a ci vai kä hmat bà ci. A cun-ung phih, ani cuh, ng’ngài èi man ci. Cun kon-ah, Herod nawh a mät ami htánák-ah k’hngüp ung Galilee khàw ung a ng’vái gùi chü gùi neh a m’ei m’áwk tu gùi zah ung, Herodia-ah htá k’hngumihtá cuh, lo neh ng’lam hleih Herod lah a k’chin gùi cuh, zèi tu ci gùi. Cun kon-ah, Sàngpù-ghang nawh k’hngumihtá àm, “Na ng’zák hlü nà san vai, kei ka ning pe khai” ci neh cun-ah k’hngumihtá àm piéin ci. Na san phung cuh, ka khàw a m’cot-ah chüt hleih ka ning pe khai ci-ah ng’phiùn mah mah neh piéin ci. K’Hngumihtá nawh a nú ah hteit neh “A i ka san vai ang? ci neh ng’si hleih “Tui k’phùm Johan-ah lu-’kè sàng-ä”a ci.
Tui k’phum Johan cuh Bawi Jesu ah maa ah hteit neh lam pyang ca a khngu pi ah k’ce-shä tumat a kya ci. Bawi Jesu a gok lo kon a Bawi Jesu mät m’shi nak cuh Jordan tuinu ung pek ca kya ci. A ni cuh däm lo khai kei cuh ka yo lo khai ci neh a pyein cuh Bawi on a pyein nak a kya ci. Cang nak cuh shangpughang Herod on pyein nak hleih thong ung a chum te ah kya ci. Herodia a tha hngumi hta ng’lam cuh avan noh yum u hleih Herod noh na shan päng kani ng’pek khai ci helih Johan a lu shang ca kya ci. Bawi Jesu noh kei cuh cang nak a ka kya ci a ci cuh a hngun m’shih neh läk tu ca kya ci. Bä ca Johan a hngu läk tu u neh cang nak cuh mi pyein hlak tu vai lah Herodia ah ng’u nak cuh kyühkyawk vai kya hlo ah m’khoh m’chah neh mi hmat tu hnging vai mi k’tha nak ko.
