Bä ciah  tui k’phuum Yohan a lu k’ke a mi m’chünpit ah mòng

Boi Yesu ah k’chang ah a kya nak ah ghinlu a mong cu tuik’puum Yohan ah bi bi nak ung ka no leng ciah kya ci. Tuik’puum Yohan cu a kya ah ng’shäi ne ngoiä hnguh shüm lä vai gui ung om ciah k’ce ng’shä gui ah a k’hngupi k’ce shä tumat ah kya ci. Boi Yesu ah a ng’nam phäi ah kya ciah Bä ciah tuik’phuum Yohan cu Christu Judea khaw ung Zachariah lah Elizabeth no a ni hta nak ah kya ci. A khokum 30 ung k’pyhon ciah Boi a a kyum lo vai ah a pyantham nak vai ah phäh ah Jordan tui k’kam pum ung om ciah hlalai ung Khanpughi ah mòng lam leng ne thähla m’thei m’thang ciah kya ci. A ni ah thähla m’thei m’thang nak cu Boi Yesu tüi k’phuum  a gah kon ah ng’päng ciah kya ci. A ni cu tui awm m’shi nak pe ci. Boi Yesu cu Mei lah Htitheing ca Muh awn m’shi nak pe ciah kya ci. Kho k’hngüp ät ung Shangpughang Herod no a na ah k’chu Herodias ah a k’chu a k’chu nak cu ba cu k’chang gui a van no a mi hmat vai ah Yohan no m’shuuk k’chak hleih a mi pha ah kya ci. Yohan cu a ni ah hngun a dí vai kü kyüh ein ne cang lam ung thähla m’thei thang ciah kya ci.

A cun ung ka no leng ne Herodias no Yohan ah k’u lo na ne ta ngon khai ah ng’ceng lo ci. Kho k’hngüp ät ung Shangpughang Herod ah a ng’tüi nak hngüp gok lo hleih Shanpughang no Galilee ung om ciah a ng’vai k’chang gui a van chü tu gui ne a poi bi ciah kya ci.A cun ah poi ung Herodias ah a hta k’hngumi Salome ah ng’lam cu akya ah ni ne Herod Shangpughang ah m’lung cu a kya ah yeikyai hlak hleih a ni no a cun ah k’hngumi hta am na na shan päng a í phih kä ning pe k’khai ci ne ng’gun ne pyein ciah kya ci.Shapughang no a cun ah a pyein cu Herodias ah hta k’hngumi no a nu ah hteit ne m’thein ba hleih a nu no tuik’phuum Yohan ah lu k’ke m’chünpit ne linpan ung tai ne na lo püi vai ci ne pyein ci. Shanpughang cu a cun ng’yak ne a m’lung a kya ah thüi tu lang pang hleih phih lo tu ci gui ah k’chang a k’daa ah maa ah a ni ah k’chü a khan nak cu a m’dang vai ah phäh ah Yohan ah luk’ke cu a mi m’chünpit vai ah pyein ci. A cun ah kya hleih Yohan ah luk’ke cu m’chünpit ne linpan ung taih ne ta Herodias ah hta k’hngumi am a mi thak lo u hleih a ni no a nu am a cun a thak ah kya ci. Yohan ah phan k’chang gui no a ni ah a gok cu hteh ba püi ne a mi k’phuh ah kya ci. Bä ciah tuik’phuum Yohan ah mong teng ah a kya ung cang lam ah phä, k’chang gui ah ni bä nak vai ah phäh ah a í phih kä kyüh ein ne pyein hlak vail ah Shangpughang a m’lung cu teng ah a kya ung a kya ah yeikyai yah lah thüihleih yah ung mät ah ng’ngaih ah a k’ten ah m’lung kä phukpit ein vai ci cu mi hmat ciah kya ci.