Bä ca Augustine ah ghünlu a mòng
Bä ca Augustine cu Christu kum pyathumkip lah hmakipleipli (354), Novenber ghaleithum hngüp ung Hliip Africa, Thagaste manggio ung k’tüi ciah kya ci. A mi ng’nu ng’be thum a mi lo nak ung ka a ni cu a vaipi a kya ci. A ni cu a k’hmo hta yah ge ung a hteihpüi awn ng’pong neh m’gugheim, eioktat ung yeikiai neh a yum ghong ca a pa a hlo ah ani cun phih kya tu ca kya ci. Cun kon ah mä a hei hngumihta gui awn yeikiai neh a ng’ngaih ngaih ah om ne ta k’ngumihta tumat awn a k’hmo tumat gah ki goi ah kya ci. A ni noh kä bi man ah khatnak a í kä om ein khai ah a m’lung hnga, omk’ih gui dídam man te ca kya ci. Kawhngüp ät ung Augustine cu a nu ah miktui m’hlon neh a taigü nak kon ah a m’lung k’hngaa ng’thonghlat lo ca kya ki.
Kho k’hngüp ät ung a ni ah m’lung kyong ah ka no a ng’yak cu “ko ne ta k’khei ä,ko ne ta k’khei ä” ci ne ng’thu k’ni a k’khei vai ah Khanpughi no a pyein cu ng’yak ne ng’thu k’ni la ne ta Bä ciah Polu no Roma Mânggo k’chang gui am a guk ah ng’thu k’ni la ne a k’khei cu “ O k’tat, gugak ni , htukk’htih comcam ni, ng’taam lah ghüsheit gui nong ne k’hngüp yah vai hlü ah ng’tüi ah a kya man düt ah mi om ip ko” (Rom 13:13) ci ne a guk cu k’khei ne kei no shin k’däih ne ka k’khei ba vai ka hlü ci ci ne a cun ung ka no a ni ung a k’khang lo ne a mi m’däi peit vai hlü ah a m’lung gei hleih kya ci ci ne Augustine mät no pyein ciah kya ci.Bä ca Anthony ah ghünlu a mòng a k’khei kon a m’shínak Saramentu ci tu khai ah am’lung phupit ca kya ci. a khokum m’kuleiko ung Roma manggio ah hteit tu neh a nu a shih awn ah Africa hliip khaw ah hteit ba ne k’taigü Boi ah kya lo ci. a cunkonnah Christukum (396)pyaathumkip lah kokipleichuk, a khokum plikipleiät ung Hippo Manggio ah Taigümang a kya lo ca kya ci.
Augustine noh (Confessions) ci ah a mäta a mong k’bäi neh a guk nak ung, a nu noh a ni ka vai ah a miktüi gänap neh a taigü man gui a mong cun phih miktui ng’hlui ah gu man ca kya ci. Augustine cu khawm’dek a khan ah hnguh hmat nak ung ghuih ca k’chang tumat a kya ci. Christian yumnak lah gukthen nak ung k’chüih ne kä dídam hnging khai ah a phu däm ca ng’thu k’däm ca nu gui cu guthen hnging ca kya ki. A ni cu Christukum (430) pyaaplikip lah thumkip ung shih ciah kya ci.
