Bä ciah Monica ah ghinlu a mòng
Bä caih Augustine ah a nu ah kya ciah Bä ciah Monica cu Christu kum 133 ung hliip lam Africa ung om caih Thagaste ung ng’tüi ciah kya ci. A ni ah nga tu pi ciah a m’ung a ng’shäi nak awn a ni ah ghatghum ne a omk’ih kä ni ciah Patritius ng’ming nak ciah a cei cu a m’lung k’thing hlat lo ciah kya ci. Patritius cu a shi nak vai kho kum ät a om ba yah ung m’shi nak Sacramentu cu ci tu ciah kya ci. Moni ca ah a hta ng’ vai pi ah kya ciah Augustine cun phih a k’hmo hta yah gei ung a om’kih kä ni ne a no ah cäicat thüi hlei nak vai ah a k’cum ah om ciah kya ci. Macinian yumghong un glut tu ne khom’dek lam ah yeikyai nak awn a ghinlu dídam khai ah om lo ciah kya ci. A ni cu Cartage khaw ung ca a ng’thei yah ung k’hngumi hta tumat awn a k’hmo tumat ah hta ci goi ah kya ci. A nu Monica cu kho kun a k’sho leng leng a miktui awi ne, a hta Augustine ka vai ah kyün hloi k’taigü ne k’tha nak ciah kya ci.
Monica cu a hta ah om k’ih gui kä ni ne a kya ah phäh ah a kya ah thüi hlei ne hnguh hmat k’chang Taigü Mâng tumat ah hteit ne a hta Augustine cu hnguh ne a nng’hta püi vai ah pyein ne kya hleih Taigü Mâng no Khanpughi no a pyan ah khok’hngüp gok lo k’khai ne, nang no na k’châk ah na mik tui gui ah phäh ah nah ta cu kídam hnging khai ci ne pyein ci. Christu kum 387 ung Augustine cu m’shi nak Sacramentu ci tu hleih a nu ah m’lung cu a kya ah dímgei ciah kya ci. Augustine cu Italy khaw dümhta ah a hteh hmat lo ne a nu Monica no Milan ah chüt hleih läk ne a hta a hnguh ba vai shui ci. A cun ah a hteh nak ung a ni ah hta cu a m’lung k’nga a omk’ih gui ng’thong hlat yop püi ci ci cu ng’yak ne a Nu ah m’lung cu a í awn phih kä täng ein hleih a kya ah yei tu ciah kya ci. A cun ung ka no Africa kho ah ng’hlst lo ba nak ung Austria tui’kam ung htinbo a k’äih yah ung a kya goi lo ciah kya ci.
A ni no a shi lo vai ung a pyein ghüt ah k’chü m’cha cu “ Ka ghünlu ung a í no phih kä na yeikyai hlak ci. Kei ka ghün cun phih nang Christian tumat ah ka ning hnguh ei nhgo khai ci ne ka ghün tu ah kya ci. Nang no nang yum nak ung ka kyä na k’phuh pei ä. Nang ka ning hta am kei no ka pyein ghüt hlü cu, Khanpughi ah Mâng k’kyak ung kei na shüm ba ci ne pyein ghüt ciah kya ci. A ni cu a kho kum 55 ung shi hleih Nu gui ghung m’htei ciah Bä ciah k’chang tumat ah kya lo ci.
