PEIT TAAK NG’KHAI NG’LANG NAK

Peit taak ng’khai ng’lang nak cuh Christian hngun ghün on nak-ung ak’tung pi-ah kia ci.Cun te ng’khai ng’lang nak, peit taak nak, gung htot nak gui phung cuh a cang-ung vah cang hngo khai. (luk  14:1 7-14)-ung Boi yeisu noh om k’ih k’ni, ng’kahi ng’lang cang-ah mong gui a pein ghüt cuh “ Cein lei ka po k’chang-ah kia hleih, cein lei ka yei nak-ah kia hleih kä peit taak-ung kä ni vai hleih, cun ka peit-ung lei cun ka gah ba khai.”ci gui-ah va ng’ngaih u ge neh k’chang gui-am kä pe tah neh m’lung-ah lo hleih peit tak ng’khai ng’lang k’cang vai ci neh mi Boi Yeisu Christu noh na ng’cäi m’ä gui ci.

     A cun-awn täng ca puma tumat mi teng shüm ko.

Bä ca Nicholas cuh peit taak ng’khai ng’lang nak-ung ang’ming thang ci. Bi lo neh, pe tah neh, gung htot neh, ng’khai ng’kang neh a ghün yah-ung om te ci. Kho k’hngüp ät kia lo hleih sik ci. A cu kon-ah ang’mü m’cha cuh khanmopi-ah gok ci. Khanmopi k’shoh ana ngäng ca bä ca Peteru-awn ng’hnguh lo ci goi. Bä ca Peteru noh bä ca Nicholas-am ghui ng’pum nu k’hngih-ah ng’pum ci cuh k’hmuh ci. Ng’pum ät cuh däm neh ng’pum ät cuh yo hta ci. Däm pi ci-ah ghui ng’pum nu cun-ung htattuh ak’däm ni ak’yo ni avan ng’cawn khai-ah apum-ah kia ci. “ Cein gui cuh i-ang bä ca Peteru-aw ci neh ng’shi hleih? Pereu noh cein gui cuh nang kho m’dek khan-ah na om yah-ung na bi ghüt gui-ah peit taak ng’khai ng’lang nak gui nei ci neh m’shang ba ci.”

     Cun-ah ghui ng’pum nu cuh hnguh neh Nicholas cuh am’lung yei hleih om ci.

Bä ca Peteru noh pyein ba mä neh “ A cun te nang kho m’dek khan-ah na om yah-ung na bi ghüt gui-ah peit taak ng’khai ng’lang nak gui cuh na m’lung-ah lo tu k’cang hleih na bi ghüt gui-ah kä kia ci nei.Ak’da pi cuh na mät ka vai-ah ng’ngaih tüh neh na bi ghüt bäng bäng nei ci cuh ng’dang ci.A ca kia hleih na bi loh gui avan cuh na m’lung-ah lo tu k’cang hleih na bi loh -ang? Kä cun-ung na mät kavai-ah ng’ngah tüh na bi-ang ci cuh teng cang vai. Cunte cein-ung om ca ghui ng’pum k’däm nu lei kä ni pyein cang ko. I kia hleih-ang Peteru-aw ci neh bä ca Nicholas noh ng’shik ci. A cein gui cuh nang bä ca Nicholas noh kho m’dek khan-a na om yah-ung na teih püi po k’chang gui, na ng’kho ng’et gui-am na peit taak nak gui-ah ng’khai ng’lang nak gui-ah kia ci. A cein gui cuh ghui ak’cang-ah kä kia ci.Gui-awn täng khai-ah ami pyan-ah kia ci. Cein gui lei cuh k’chang gut ei, m’guk ei gui hngo noh bi hnging ci gui ci neh pyein ci.

Bä ca Peteru noh apyein kä phleh pha hleih, ghui ng’pum nu avan cuh m’vuit khui-ah ng’lap yop ci. Cun kon-ah Peteru cuh k’chü dawn la neh ghui ng’pum k’yo lam täng-ah ng’hlat ci.K’chü dawn hta-awn ghui ng’pum ak’yo-ung kah la neh k’chü ci. Ghui ng’ma gin cuh k’ka-ah ng’kyah neh ang’ma m’kom gui cuh k’chü dawn k’kyong-ah k’poih ghüt ci.

“Bä ca Peteru-aw i gui nei na bi lo vü? Kei lei kä hmat ci nei ka boi-aw ci neh Nicholas noh pyein ci.”

 Bä ca Nicholas-aw na bi loh gui ghüt te-ah peit taak ng’khai ng’lang nak gui-ung tu mat mat ka gah ba khai ci-ah ng’ngaih u neh na bi man gui ng’dang ba dan ba-ah kia ci.Na ng’ngaih u-ah ci-ah na gah ba ci-ah maw. A k’hngät lei na ng’ngaih u-ah tah da tu ba hleih na gah ci-ah kä kia naw? A cun pyein ne tah bä ca Peteru noh k’chü dawn-ah k’kyong-ah om ca htattuh gui k’ka-ah k’cha yop ci.M’dek-ung kä gok pha hleih cun gui cuh m’vut khui-ah kia yop ci. Cun kon-ah Peteru noh yo tuba ca k’chü dawn la neh ma neh ak’chü yah-ung yu ng’kyak ci gui-ah htattuh gui cuh ko ba neh k’chü ba mä ci. Ak’ka-ah kä ng’kya neh k’chü dawn-ah kyong-ah k’poih ba ci gui cuh ko neh aphe-ah ghot hleih acun-ah hlo bä-ah m’vut khui-ah ng’lat ba yop ci.

 “Cein gui cun mä, bä ca Petereu -aw ci neh bä ca Nicholas noh ng’sik ci. Ani noh “ K’chü dawn-ah k’kyong-ah k’poih ghüt ci gui cuh nang bä ca Nicholas noh k’chang gui noh ami ni m’tam vai ng’ya hlü neh abi gui-ah peit tak ng’khai ng’lang nak-ah kia ci. K’chang nak ci ci cuh ng’khai ng’lang nak cuh ng’yung na u neh, k’chang gui noh ami yum m’nai tu vai-ah pyang ci gui, bä Nicholas-aw. Ak’ni bi vai nak-ung ka noh ak’she lam täng ng’hlat shan ci.

Peteru noh shiip pi ca k’chü dawn cuh la neh k’ka-ah ng’kyak ca ng’ma gün hta gui cuh ko ba neh k’chü ba mä ci.K’chü dawn ak’chü hlu-ah bä ca Nicholas cuh k’dang neh tu k’bäih nang-ah na m’lung k’ni, ng’ngaih ni-awn an bi gui ghüt-ah peit taak ng’khai ng’lang nak gui ni teng khai,ci neh k’chü ba mä ci. Acun-ah hlo-ah k’chü dawn k’kyong-ah cuh phyom neh ghot ba hleih m’vut khui bä-ah ng’lat ba ci.

Bä ca Peteru noh shiip lo pi ca k’chü dawn cuh yap lo hleih Nicholas cuh cäi lo ci.K’chü lo ba mä khai cineh Nicholas cuh amät-ah ng’kyang buh neh pyein ci.

Kya ci nei Nicholas-aw peit vai ci u hleih peit ni, gung tu vai ci u hleih gung tu gui ni ng’chak khai-ah teng lo ba mä vai.

Bä ca Peteru noh a pyein hlu-ah k’chü ba mä ci. K’ka-ah ng’kyak ci lah k’poih ghüt ci-ah ng’cha ba ci.K’poih ba ghüt ci gui cuh ghot ba hleih m’vut khui-ah ng’lat ba mä ci.

“Bä ca Peteru-aw na bä hta ni ng’düm-ei-ä.”ci neh a miktui ng’kya lo hleih Nicholas noh pyein ci. Kä cun-ung kei khanmopi-ah kä lut tu hlot khai-ah mo,ci ci.

Ni k’chü ba cang ko Nicholas-aw. Na bi ghüt-ah peit taak ng’khai ng’lang nak gui ni shui cang khai nei.Na bi loh gui ang’kyak-ei-ung I ci vai? Kä cun-ung shin-ah k’chang lei kä gung htot-ah ni ci, Shin-ah k’chang lei kä peit taak-ah nei ci ci neh na peit gui, na gung gui, aom ba-ung i na ci khai nei?

 Bä ca Peteru noh a pyein cuh Nicholas-ah k’hnga-ung kä gok ba ci. Ghui ton hta gui kä k’pha nak-ah gok-ei neh, mät-ah om ca ghui ton hta gui ng’kya neh amaih hlok-ah ka tu pi ci. I nei aom ba ko bä ca Peteru-aw?

 Ä nag-ah om ci gui cuh ghui tu k’cang-ah kä kya ci. A k’gu noh a pyein-ah ghui gui-ah akia-ung mä? Ci neh bä ca Peteru noh pyein ba ci.

Bä ca Nicholas-aw ghui tu k’cang cuh gah vai kä ng’hloi-ah hlo-ah peit taak tu k’cang ng’khai ng’lang tu k’cang ci gui cuh kä om shan ci.Khanmopi im gok vai phäh-ah ng’ngaih u nak kä om-ein hleih peit taak nak,mät ka vai ng’ngai u nak kä om-ein hleih ng’khai ng’lang nak gui cun nei peit taak nak k’cang ng’khai ng’lang nak k’cang-ah kia ci. Bä ca Nicholas-aw kä na thüi vai nei, kei-ung ng’thu k’ni om ci.

“a i-ah ng’thu k’ni nei bä ca Peteru-aw?

Mi Boi Khanpughü cuh peit taak ng’khai ng’lang nak-ung bä tu pi ca Boi-ah kia ci.Khanpughü-ah peit taak ng’kahi ng’lang nak gui cuh ghui tu k’cang-ah kia ci.

Cun te kei-ah kut-ung i phih kä om ba ca maw, bä ca Peteru-aw? Ci neh bä ca Nicholas noh akyah awk-wn pyein ci.

A cein gui cun noh vah nang bä ca Nicholas i hlok cha na du khaih ci cuh m’dang ci. Ci neh bä ca Peteru noh pyein ci. Cun tu pang-ah phih kä ng’ä-ein-ä, bä ca Nicholas-aw.Mi Boi pa khanpughü noh du khaih ci gui lah ami mät noh ami mät ami du khaih cuh hmat u neh kä ng’a ng’ca, kä kyüh kyok-ein neh, kä shung-ein neh om ci gui cuh yei na pi ci nei.

Häi,Häi Khanmopi im-ah ni lut ko. Lo Lo