Papa Shangpughang ah ng’thu
Papa Shangpughang Leo no a pyein cu Khanpughi cu Pa ah m’hngi nak lah k’chü m’gein nak om ciah a kya ung a ni cu a cum ah a kut ne pe gui ne na do gui ci. A I kya hleih ang Boi no k’pyon nak gah vai a phäh ah ng’hteik ciah m’kot un glut vä a ci? Khanpughi cu mi m’lung ng’kyak khai ah k’tha nak ciah kä kya ci. yum nak ung kä cang nak lam ah nga tu pi ne a mät no a mät k’pyhon nak gah püi ciah ng’ngai ciah k’chang gui am a pyein ah kya ci. A k’ni ah yum nak lam läk ne yum ci gui cu ni nak ung om khai gui. K’chang tumat ah m’lung k’nga cu yum nak lam bi loh nak düt awn ng’thong hlat khai ah kä kya ci. Khanpughi cu k’taigü m’shümchuk nak kä om ci gui shui ciah Khanpughi ah kä kya ci. Mi mi gui ah phäina nu be gui ah khan ah m’hngi nak lah taga nak kä om ah a kya ung gänap nak lah k’taigü nak bi vai phih kä hlü ci.
A cun ah kya hleih a mät ah phäina nu be kä m’hngi kä k’chü m’gein ne, taga nak kä om ci gui cu a ni ah k’chü ng’ngai ne Boi awn a khäh ah ei a täng ah a mi ei tu lang pang ung phih Boi no ngami ung ka no hteih hta gui khai ah kya ci. A k’hmät yum nak ung kä khäng htek ci gui pyein ciah yum tu k’chang gui m’gong düt awn khanpughi yum ci ne m’dang hlü cu a k’cang ah m’lung k’kyong ka no yum ah kä kya ci. Yum nak cu mät ah ghinlu ah a kya lo kon ah va a cang ah yum nak cu kya lo ciah kya hleih Boi Yesu no a bi ah hlo ah ni ci lam gui bi ne, m’hngi nak ung bi hlü ciah k’hngumi k’pami ah kya lo ah kya ci. Boi Yesu no yaica buiawt nak ah lam a ghü ah hlo ah mi mi gui phih a u no kä hteh nak hlü, au ah kä bi hlü gui ghü hnging vai ah k’tha na ne k’chang gui ah nibä nak vai ah gänap ne bi vai ah kya ci. ng’hteik ne yaicai buiawt nak gui a lam ghü ung yaica vai ah kyat u lang pang hleih phih Khanmopi yeikyai nak gah vai ah kya ci ci ne Papa Shangpughang Leo no pyein ciah kya ci.
Source: Vatican News
