Bä ciah Louis ah ghünlu a mòng
Pyinhtit ghunkhaw ung khaw ah Shangpughang ah kya ciah Bä ciah Louis cu Christu kum 1214 ung Poise Mânggo ung ng’tüi ciah kya ci. A nu no a hta cu ni ciah Christian k’chang tumat ah a kya lo vai ah lah bä caih khong mang k’chang tumat ah a kya lo tu vai ah a k’ni ah a pyantham ah kya ci. A ni ah a nu no a pyein “Ka hta aw, a nu no a hta a m’hngi hnging vai hlok ah kei no nang ka ning m’hngi ci. Cun phih kat nak a däm na bi ah ta ka kho kûng ah na shi va ka hnguh hlü ci ci ne a hta am pyein hti ciah kya ci. Louis cu a kho kum 19 ung Minhtami Magaret awn k’kyawng khui khoi ne om ni ne a k’hmo 11 gah ci goi ah kya ci. Louis cu a kho kum 22 va lo pha hleih Pyinhtit khaw ah Shangpughang tumat ah kya lo ne a hei Shangpughang gui awn kä täng ne a ni ah uk nak, abi loh gui cu nga tu pi ne bi hnging ciah kya ci.
A ni no a bi loh gui a van cu Khanpughi ah Taimah nak vai lah k’chang gui ah ni bä nak vai a phäh ah kya ci. A ni cu k’phlan lo nak gui kä ci hlak gui ne a cun awn duyai k’chang gui gunghtot gui ciah kya ci. K’chang gui kä ni a mong gui cun phih kä pyein tu man ciah kya ci. A ni cu Yumtu k’bum ah khan ah a kya ah m’hngih ne a kat nak gui ah phä ah a ni ah bi loh omk’ih, k’taig kyün hloi nak gui awn a k’ni ah ng’pyangtham ba hti ciah kya ci. Bä ciah Louis cu a ni kä yei na ne, a bi loh gui kä k’bäi tu ci gui ah khan ah phih k’chü m’gein gui hnging ciah kya ci. A ni a í ah boh kya nak ciah minhta tu mat cun phih a ni am ngon hlak u hleih A pa ah k’chü ng’ngai ne kä ngon khai ah pyein ne dam ciah kya ci. A ni no a pyein “ A hta tumat no a pa ah k’chü a ng’ngaih vai kä dam khai ci ne pyein ci. A ni cu Christu kum 1250 ung yum nak lam ah a mi ng’tukah nak ung khong mang tu hleih pha ne a mi chum ah kya ci. Thong khui k’kyong ah a om yah ung Khanpughi ah Taimah nak ah Myita gui cu a k’hngüp täi m’cu ne om ciah kya ci.
A ni cu Thong khui k’kyong ka a luh lo ba kon ah Pyinhtit khaw ah kä hteh ba pha ung Htitheing ciah kho m’dek ah hteit ciah kya ci. A ni cu Christu kum 1270 ung a hei yum nak lam ah phäh ah ng’tukah nak cu leng ne bi ba mä ciah kya ci. Cun tu pang ah phih a ni cu goi lo ne …. ung shi ciah kya ci. A ni no kä shih pha ung a guk nak ah Will ung “Ka hta aw, namät no namät kat nak a k’däm na bi ah ta, a I ah mäih ah kalu nak gui phih na khan hnging ci” ci ne guk ci.
