Bä ciah Philip Benizi ah ghünlu a mong

Bä ciah Philip Benizi cu Christu kum 1233, August k’cha 15 ung Italy khaw, Florence ung ng’tüi ciah kya ci. Pari Mânggo lah Padua ung sei pinnyia gui a ng’thei ng’thang kon ah a kho kum 19 ung htamaadaw ah kya lo ci. A ni cu ng’thu k’ni lah yumtu ng’bum ah Pa gui ah a mi ca gui a k’ni ah a hnguh hmat vai ah k’khei ne ci ci. A khokum 21 ung a ni cu sei a bi nak gui nong ne a kya ah m’htek ciah tum nak lam a ng’htoi tumat ung yumtu k’chang tumat düt ah kya ne lut ne bi tu ciah kya ci. Phaya kyawng ah a hngu lam ah om ciah kû hta tumat ung Christu kum 1255 ung ka no 1258 a chüt hleih läklam gui awn a täng ah k’taigü ne a cun ung om ciah k’cham hta m’htei ne ta a hei k’tha na ne bi nak gui vai ung phih bi tu ciah kya ci.

Siena ah a hteh nak ah a mi ng’thu ng’hta nak ung ng’thu k’ni lah yumtu ng’bum ah yum nak gui a mòng ung Philip ah hnguh hmat gui cu a kya ah be ne dâ ciah kya hleih a ni läk tu ci gui ah a k’chang gui cu a kya ah cäicat ne ngak tu ci gui ah kya ci. A ni cu a kya ah däm ne bi vai dâ caih yathû cu a mi peit ah kya ci. A ni cu Italy ghunkhaw ung a u no kä ng’ngahtüh ah a m’thei m’thang a kya ah ni ciah k’chang tumat ah kya lo ci. A ni cu k’chang gui a mi ät vai ah ni püi thei ne bi loh nak gui ung phih a k’ni ah ng’hloi ng’hlak khai ah pyangtham thei ciah hnguh hmat k’chang tumat ah kya ne a bi loh gui a k’dä ng’hloi ng’hlak ne ng’päng khai ah bi hnging ciah kya ci. Cun kon ah a ni cu k’chang gui ah ng’lak ah a k’ni ah ng’gei ng’cam nak vai ah lam pyang thang hnging ciah k’chang ah phih kya ci. Yumtu ng’bum ung kä ng’khot ng’gei nak ah gui phih dímgei khai ah lam pyang ne, yum nak lam ung kä khänghtek ci gui, kya ghüi ghüi ne kä k’tha nak ci gui Phaya kyawng ah a mi gok lo tub a hnging vai ah phih chü tub a gui hnging ciah kya ci. Bä ciah Philip Benizi cu Christu kum 1285, August k’cha 22 ung shih ciah kya ci. A ni cu Tuscany lah Italy ghunkhaw ghung m’htei ciah Bä ciah k’chang tumat ah kya ci.