HMA KAT PHION NAK AK’NI-AH BI HNGING VAI -AH HLü CA MONG GUI
Hmakat phoin nak Secramentu kyüm be hleih bi hnging vai phäh apat phyei yah-ung hle hlak-ah k’chü m’kha kä pyein vai .
- Mät-ah ni bä nak gui ng’lä ng’tai neh kä pyein vai.
- K’tai gü boi noh ana ng’shi gui ak’cang-ah m’shang vai.Kat nak om ca kei cuh na k’chü hnga to ci neh ng’hui vai.
- Apat phyei-ah-ung kat nak gui k’poih nak neh am’shah k’täigü boi noh kä ng’yak vai-ah kä pyein vai.
- Kat nak gui m’däm neh kä pyein vai.
- Apat phyei-ah-ung k’chang hngei gui-ah kat nak gui kä pyein vai.
- Hti theing ca Secramentu she kak khai gui-ah ng’thu gui hloi vai.
Kat nak lah m’gein nak
Shin-ah Secramentu-ung gah hnging gui cuh kat nak-ung ka noh phyon nak lah Khanpughü-ah ni bä nak gui gah -ah kia ci. Kat nak k’däm gui ma neh ak’tung pi-ah ng’ngaih tüh ba vai.Kat nak k’däm gui k’poih nak-ung pyein-ah kat nak gui lah k’poih nak-ah kat nak gui phih kä phyon vai. I kia hleih ci-ung kat nak k’däm gui cuh maih ca Khanpughü-ah ni bä nak kyeisu gui gah ba hnging vai phäh-ah lam khai ca kia ci.Cun gui-ah phäh-ah ng’yu ba neh apat phyei-ung kat nak-ung ka noh phyon vai kia ci. Kat nak yo k’däm-ah phäh ng’yu ba vai. Kat nak am’shah-ah phäh bäng ng’tu ba-ung Khanpughü-ah ni bä nak gui-ah phäh m’di-ah kia ci.
Kat nak k’yo gui-ah khanpughü-ah ni bä nak gui gah nak vai kä khai tu pang hleih phih kat nak k’däm gui avan ng’yu ba vai. Kä cun-ung kat nak k’yo gui-ah phäh phih kä phyon vai.Kat nak k’dä gui noh Khanpughü-ah ni bä nak gui cuh khai ci. Go ca k’chang tumat noh Sei boi-am am’neh-ah kyä-ung kah ak’däm tu ba gui cuh m’thein tu ma khai kia ci. A cun-ah hlo-ah ng’mü m’cha lam täng-ah shei boi vai hlü-ah m’thein tu vai hlü ci.
M’gein nak lah kat nak gui-ah phäh-ah ng’ä nak gui
Mikmi gui cuh apat phyei nak gui-ung m’gein nak püi-ah kat nak gui-ah phäh-ah mi ng’ä hti ci.Mikmi gui i mäih-ah kat nak gui mi bi-ung phih cang ca ng’yu nak ba aom-ung mi phyong khai kia ci. Khanpughü noh am’gein püi-ah kat nak gui kä shüm ba ci.
Ng’loh nak k’hngih-ah mong
- M’htei kho-ung ng’loh ng’chan nak
- Kho m’dek khan-ah ng’loh ng’chan nak
Mikmi gui cuh apat phyei neh cang ca ng’yu nak ba gui mi bi-ung phih ng’loh ng’chan nak cuh k’poih ba ci. M’htei kho mei-ung kavai phion-ei-ung phih kho m’dek khan ng’loh nak cuh om ba ci. Vai hlü-ung, ng’thu k’theing-ung k’hngumi kat nak ca David Shagpughang cuh ng’yu ba neh m’gein nak gah tu lang hleih phih kho m’dek khan ng’loh ng’chan nak cuh k’poih ca ci. Cun-ah phäh-ah ahta Bethsabel cuh sik ci. Ani cuh cun-ah phäh-ah thüi hlei nak gui-awn ng’lo ng’chang ba ci. Adam lah Eve cun phih ani kat nak-ah phäh-ah m’gein nak gah ci goi. Cung phih kho m’dek khan-ah ghü nak, goi ge nak, sih nak gui cuh bui ci goi.Mose cun phih Khangpughü ayum nak kyen hleih lukpo hngih vei am’ghuih-ah phäh-ah m’gein nak gah ci te cung phih Khanpughü noh am’shüm-ah Kanan kho kä gok tu hloit ci.
Kho m’dek khan-ah ng’loh ng’chan nak
Mikmi gui cuh k’taigü Boi noh an peit gui-ah ng’loh nak gui mi bi-ung ng’loh nak vai api ng’gheip ci.Cun kon-ah ei hloi nak, peit tak nak, Shuh ahan nak, ng’gung tu nak lah yumtu ng’bum-ung bi loh nak tu gui-awn ng’loh ng’chan nak vai gui hlü cuh ng’pai ci.
