Taliksan gui lah akhòtüi
Pongpüî biloh tumat gukthénnak ung acun ah biloh màmòòng ah phäh ah kya lo hnging khai ah akhòtüî pèingléng a plohkheihnak ah mòòng ngah-tüh nak ung acun ah biloh pongpüî cuh. mdekkshîn,ók ah tûi lah khòkkhì i hlok ah a plohkheih bäng ngah-tüh neh acun ah biloh pongpüî ah phäh ah a hngùn kghìng gui ah kkhân ah chüt gok ca a kyihkshé mòòng ngah-tühnak apí kchù düt hnguh ah kya neh a hngùn kghìng gui lah shingghìng kkhúi gui cuh aktúng ah kä kya ci vai hlü ah bilohnak gui cuh hnguh ah kya ci.Hteh-htônnak lam kcoh nu gui coh nak,géitkònak uyin ngvòng kchàm ah phäh ah ngdühngün khònglêi akkhak ngvòng kchàm nak,tûilì khmòi gui tûikham cohngphlàinak gui acun ah hlô ah ahêi däm ngphät pongpüî mòòng guthén neh biloh nak gui ah phäh ah taliksan a hngùn kghìng gui ah omnak bunghngù,khògûi,khòmhtûng gui ngtèingpài neh mangca ah phäh ah taliksan gui ka vai ami ngdühngün a maihnak,ami ngphyüt ngpâinak,ahêi ngdühngün gui ah ngplônngplap neh kä mi gahnak,ami ngngaih kä mi lûmnak gui om lo ci.
Taliksan a hngùn kghìng gui kä plohkheih vai ami kbäî ah ngdühngün ah hlô ah ahêi biloh pongpüî gui on phih ngtüì om lo khai ah akshé lam gui kên hlak hnging ci.Cung phih ghunkhò apí ung vah acun ah hlô ah hnguh hmatnak om hleih biloh nak gui cuh hnguh hnging ah kya ci.Ashängshäng ci vai ah hlùmmlèi mòòng ah phäh ah ami m’yót vai a hngùn kghìng amshah ngónkhamit nak mi bi lo ah akya ung acun gui käa mi cìn maih vai ghùng neh akhòtüî pèingléng ah kä tàgá nak mhtéi vai phäh ah a hngùn kghìng gui ami pùng khéi lo ah nì lam gui shûi ktäih nak vai mlùng khngànak apí düt vah mi hngu hnging ci.Kchòkhò ah a hngùn kghìng kkhúi gui ngkyüm neh om màn ci tuhchü a i ah kya hleih a maih lo cuh mi teng shüm ko.Ngphlän pyi ca kum phya yah ung Kchòkhò cuh Mvùi,mtü,kkhòm,kchù
mngâ,hlakchuk,hlángyà gui dá neh ghíngnú ghàmpá ah kchìng khlèi neh om man ci.Tuhchü cuh akdá pí ung khò kpú neh kphyú kkhá khìhlá kèn lo ci.Mà neh maih ci cuh mvùi ah kya ci.A i ah kya hleih ci ung Kchò gui cuh Mvùi ami ngón ung akdäm pí ami ngón hnging ah phäh ah ngtâ na ci gui.Mvùi ngón yop u neh kong ni,kkhòm ni ngón ne nglä ngtâi ba ci gui.Hlákchuk hlángyà,hlákkhì phih maih lo ghepghep ci.Tuhchü cuh NGO gui,kyawng gui lah ghunkhò ùknak gui ung phih a hngùn kghìng gui mhtéi vai,shingghìng bunghngù kä plohkheih ba vai avan no mthêi lo te ci cuh akní ah yat hleih u noh kä läk pha ci.Tuhchü cuh Myanmar khò púm ngtuk ng’ah nak yat lo chütah acun ah ngtuk ng’ah nak ung ami plohkheih mshih mkyuk ahkhhú kkhá,kkhìhlá,uî,aì,vok,mê,mkyütmkyap,khùmhlâi,shingghíng gui akkhak dí ca kya ci.
Cun tu pâng ah phih ayan a ngkyùng k’hlùi on ngpòng neh ngúi ghui,lung,shing,kphyú kkhá,khìhlá gui m’gu neh m’yót neh ami ci màn gui cuh kèn lo ci.Akkyìng khlùi tuk ca khmó kthô gui no phih akhòtŭi pèingléng lah acun ung om ci gui ghunmhtéi vai ah pyéin lo ci gui.Kchòkhò ung khmó kthô gui no tûikhong kä vók ba vai,kphyú kkhá ami mtùi kkhéi yah ung,kîkòng,ngá k’âi gui ami pùng pyah yah ung kä ngón phâ ba vai pyéin lo ci gui.Acun cuh avan noh a läk ung vah akhòtüî pèingléng lah acun ung om ci gui mi mhtéimhtà hnging khai kya ci.
