Khoh tang lah Khanmopi ghün kho
Cun kon-ah, Jesu nawh a-hlu-läk gùi àm a piéin cuh, “Nangmí àm a k’càng-ah ka piéin cuh, khawh gah ci cuh, Khãnmòpí khàw-ah a gok vai khak ci. Cun kon-ah, nangmi àm ka piéin cuh, “Khawh-mah ci, Khãnmòpí-ah a luh-atah, Kala-uk ng’piüm k’hngài ung lut thei pí ci,” ci ci. Cun gùi cuh, a k’chàng gùi nawh ng’za neh cäi-cat u neh “cun-ah a kia-ung a u phiòng hnging khai ang? ci ci gùi. Jesu nawh ngami teng gùi nehtah “Sin cuh, k’chàng gùi nawh kä ci hnging ci gùi. Khãnpùghí nawh a i phih ci hnging ci,” ci ci.
Cun kon ah Petru nawh “keimi gùi cuh, om ci phùng nawng ghüt u neh na hngú-ah kami ning läk pi ci. A i, ng’khéng kami gah khai mä? ci neh ng’thu-mãng bà hleih Jesu nawh “a k’càng-ah ka piéin cuh, a päng ng’müng päng cuh, a k’thài ah pian lo bà zah-ung, k’chàng-a htá cuh ghin khàw ng’täi-ah ngoh lo ung ka hlu nami na läk ci gùi cuh, hlüng-tài pí k’bäih ci-ah, ’kiak gha-leigoi ung ngoh u neh Israel pa-khúi gha-leigoi cuh, nami m’cha m’làng lo gùi khai. A u pang-tah Kei-ah ng’ming awn im, núbè, a pá, a nú, a k’chú, a htá, a phäí-nàü, a lung khàw gùi nawng ghüt ci-ah k’chàng cuh a ng’khap phiã-ah gah neh ghin-lu ng’dün phih gah khai. Hngú te ci ni, mà lo khai gùi. Mà te ci ni cuh, hngú lo khai gùi.
Khanpughi cuh mi m’lung hnga k’thagui a van on mi m’hngi vai mi yei nak vai ah kya ci. Ng’büng mang a phäh ah kat nak kä om ci. Mät a khoh tang noh na khip hleih om neh a u on phih kä gung tu cuh van teihpüi pok k’chang kä m’hngi ah kya ci.
