NU MARIA KHANMOPI-AH AMI KAI PüI-AH MONG

Kum (1950) hmüi k’cha a htük k’hngüp-ung Papa Shangpughang Pius a (12) nak noh Nu Maria cuh kyä lah m’cha ng’don hleih khanmopi-ah ami khai püi-ah mong cuh yum nak tumat-ah ng’thu shä ci.

Cun-ah ng’thu a shä cuh “Mikmi na k’phyon gui ca Boi Christu-ah hlu-ah phih kyai, hti theing ca hlu läk ng’shä goi Peter lah Paul hlu-ah phih kyai, ngani hlu-ah mi gah tu-ah mikmi gui hlu-ah phih kyai, hti theing ca Khanpughü-ah nua ng’düih-ah ng’la mi-ah kya ca Maria cuh shin-ah kho m’dek k’khan-ah aom nak a ng’pyi lo-ung ng’mü m’cha lah pum kyä mah-ah khanmopi-ah ami kai püi vai mong cuh Khanpughü-ah thuuk ca k’chü khän-ah akia-ah mong cuh mikmi noh ng’khän hleih ng’thu mi shä ci nei.” [Pius 12; In his apostolic Munificentissimus Deus; Novenber 1,1950].

Christian gui-ah yum nak lak thuum gui-awn ng’pak hleih yumtu ng’bum-ah m’thei m’cäi gui cuh ng’thu k’theing-awn api-ah phih kä ng’peng ci. Nu Maria cuh kat nak gui päng-awn phlawi neh kat nak-ah phäh-ah shih nak pum kyä-ah di dam nak gui, m’vut khui-ung-ah lo neh m’vut khui-ung hteh nak ba gui cuh ani-ung kä om khai. Nu Maria cuh khanmopi ghui im-ah aom tu vai cuh ghün lo ba khai k’chang gui-ah hnguh htük-ah kia ci.

Cun bäng kä kya hleih ami pum kyä kä di dam hleih khanmopi-ah ami kai püi gui-ah k’chang k’bä gui cun phih om ca kia-ah mong lah Boi Christu a k’hngih vei nak a kyum lo ba-ung am’shah cuh kyä lah m’cha ng’dawn hleih ana do chang khai gui-ah mong cuh ng’thu k’theing -ung om ci.

Prophet Alia cun phih pum kyä lah ng’mü m’cha mah-ah khanmopi-ah kai ci.Enoch cun phih ayum nak-awn shih nak k’chen neh khanmopi-ah kai ci.

Cun-ah hlo-ah kat mah k’chang gui pang hngo Khnapughü-ah k’khan-ah yum nak, beit ng’ngaih  nak gui-awn ghüng neh Khnapughü-ah ng’yak hlü-ah om ci gui cuh pum kyä kä di neh sih nak k’chen neh khanmopi-ah a k’ghüng-ah ami gok-ung kat nak noh kä koh-a Khanpughü am’lung k’tha avan-awn yum ca, ni bä nak gui-awn a k’tung -ah be ca Nu Maria cuh khanmopi-ah a k’ghüng-ah gok ci ci cuh k’hle vai kä om khai kia ci.

Cun-ah yum nak k’hleh vuh mät-ah pum kyä mah-ah ghün lo ba vai mong k’hleh-awn täng ci.

Bä ca Polu noh a pyein cuh ghüng ba neh mi k’poih ba ca mikmi gui cuh khanmopi-ah khanpughü-ah mi gok tu vai phäh kho ng’mei k’khan-ah yäk k’chan nak-awn khanpughü-awn atäng-ah mi om tu khai. Mi k’poih ba ghüt ca k’chang gui cuh ma neh sik ca k’chang gui-ah tah kä mi ma tu ba khai. A caw kia hleih pum kyä kä di dam-ein neh ng’dün neh ghün nak gah ca k’chang k’ä gui ami om-ah hlo-ah Boi Christu a k’hngih vei nak a kyum lo ba-ung k’poi ba ghüt ca k’chang gui pum kyä-ah sih nak kä om-ung Nu Maria cuh a k’ghüng-ah khanmopi-ah ami kai püi ci cuh ng’cuh nak vai kä om khai.

Cun kon-ah k’däih neh ni bä nak-awn be ca Khanpughü-ah nu Maria cuh kat nak kä k’om-ah a ng’tüi nak, kat nak kä om ca Khanpughü-ah nu-ah a ghün om nak, kho k’nget kah kho k’nget-ah ma mong gui cuh ahta yeisu-awn atäng-ah tuk neh am’chüt nak tu gui-awn Nu Maria cuh pum kyä lah ng’mü m’cha mah mah-ah Shangpughang-ah kia ca ahta yeisu-ah pei-ah Shangpinu-ah aom-ah mong cuh thuuk hleih mi hmat hnging ca kia ci.

Catholic noh a m’theing m’cäi-ah hlo-ah Nu Maria cuh a k’ghüng-ah khanmopi-ah kai ci ci-ah yum nak cuh Pa Khanpughü-ah ng’yak hlü-awn kong ät ca mong, ng’thu k’theing-awn phih kä peng ca mong lah cun-an ng’thu k’theing mät noh yum nak cuh ng’khan ci-ah kia ci.Cun-ah kia hleih Boi Christu cuh k’phyon ca Boi ci neh mi yum ca mikmi gui noh cun-ah yum nak cuh mi yum vai-ah kia ci.

Khanmopi-ah pum kyä ng’mü m’cha mah-ah kai ca Nu Maria-aw kei mi gui ka vai na ng’hui ng’pa tu peit gui-ä.