Na hta-hmo kavai na ng’shong ne ang?

Nu Pa gui cuh hta-k’hmo kavai ah om ci gui ah kya ci. Hta gui kavai kä ng’shong ung a u kavai ang mi ng’shong ko ci cuh Nu Pa gui noh ami hmat vai hlü ci. Hta k’hmo gui ah ni bä nak vai, a mi ng’hloi hlak nak vai, a k’ni ah ami ghün om hnging vai cuh Nu Pa gui ah bi lah om püi gui on teng vai kya ci. Ni ci ah Nu Pa ung kah ni ciah hta k’hmo gui om lo khai. Nu Pa gui cuh hta-k’hmo gui kavai ci cuh mi hmat vai hlü ci. Hta k’hmo kavai kä ng’shong ciah Nu Pa kä kya en vai among chuk mi läk ko.

1. Nu Pa ci cuh Khanpughi ung ka noh lo ci. Hta k’hmo gui ah yum khin vai, ng’tha ko püi vai, m’lung ng’ngaih goi ng’hmat khai a mi om püi gui vai hlü ci. Hta k’hmo gui ah a mi yeikyai nak, ami thüi hle nak gui ung mi om püi gui thei vai a kya ci. Hmat thei ci ah Nu Pa cuh a k’hmo gui ah gai-gong nak phih kyai, ami mät noh ami mät ami hmat thei vai phih kyai, k’chang gui on ami ng’khot ng’gei vai phih kyai lam m’shüm gui ci.
2. Na hta gui on a k’ni ah nami ng’hmat vai na k’tha nak vai. Na hta k’hmo gui ah k’chü nami ng’ngaih thei vai. A k’ten a nami ng’ngaih vai, nami pyein vai nami ng’ngaih nak vai, lah nami m’lung kä sheit khai ah nami ng’ngaih nak vai (James 1:19). A k’hmo gui on nami om yah ung ami yei vai nami om püi gui vai. Nami m’cäi gui thei ung kä ng’ngai lo ba hlük khai gui. Nami yei nak gui lah ngami kavai nami om cuh nami m’dang vai
3. Na m’lung a luh lo a ci ah kä na pyein vai. A k’hmo gui cuh a i yah ung pyein khin lah kä pyein khin cun phih ami hmat vai m’thei gui vai. Pa gui cuh m’lung k’she neh kya man ci gui. Cun tu pang a phih a k’hmo gui ami m’lung k’she ung a i ah kya hleih ami m’lung k’she cuh ami hmat vai nami ci vai.
4. Pughi pa gui ah om man gui on kä täng ba ci ci cuh nami hmat vai. Mät a om man gui shüm ba neh cun a kä kya en khai gui ah mi m’thei gui khai. “Trauma” ci ah a k’hmo gui ah m’lung kyong a kä ni ci gui kä lut khai ah mi k’tha nak khai ah kya ci. Mi k’hmo gui kavai mi ni hnging vai, mi om hnging vai cuh htitheing ca muh ah k’thagui hlü ca kya ci.
5. Bi bi lah kyawng khui a täng a teng thei vai. Bi mi bi cuh ni ca kya ci. Cun ung phih mi im kyawng khui mi m’htei vai lah a k’hmo gui on a täng a mi om püi gui vai cuh mi hmat vai a kya ci. Ami ng’tüinak phih kyai, kyawng khui ät hta neh a hoi poh hteit nak phih kyai mi bi hnging vai mi k’tha nak khai. K’hmo gui on ng’tha-ko hti vai a kya ci.
6. Pa tumat a gung-htot nak a om vai lah k’thagui peit vai cuh hlü ci. Ami bi hlü gui bi hlak gui neh mi gung tu gui vai cuh Nu Pa ah bi vai kya ci. Nu Pa ci cuh a van kä ng’kyüm be ci gui. cun ung phih hta k’hmo gui kavai kä m’thong hnging a ni bä nak a kya ci. Copyright © 2025 by FamilyLife. All rights reserved.