Mi hnguh hnging ah kkóng k’om a hngùn kghìng gui lah kkhá gui ami maih lo ah mòòng
A cun mi hmat ah akya ung mi mlùng ngngaih kä dìm kyäp neh acun noh na hmóngcàng gui khai hlü.Akhòtüî pèingléng ah a bî a ngnéng ah a bi gäkgäk hnging ah phäh ah kpâ gui,tûilìnú gui ung om ca tûikpân gui,kcâkòi gui,mkyütmkyap gui,mdek kkhân ah ngyói neh hteit ca a hngùn kghìng gui,kä kkhêi kevek ah mkyüt kkhùi hta gui ciah a hngùn kghìng gui ah ghin om nak gui cuh hlü ci.Kä hnguh shàn ah a hngùn kghìng gui cuh aktúng pí ah kä mi hnguh tu làng pâng ah phih ngami cuh ngdükhònglêi tumat ah akhòtüî pèingléng a tàgá vai phäh ah aktúng pí ah màmòòng ung ka noh cùm bòi hngün hngòk neh bilô ci gui.Akhòtüî pèingléng cuh ng’ä ngcäí nak vai ah chüt hleih a gok lo ung kchàng gui cuh a i bo tumat kùkù luh shí neh bi lo ci gui.Cun tu pang a phih tuhchü ah khing ung akhòtüî myung kthá gui ah kkhân ah a nglak düt ung kbàn neh bîloh gui ashängshäng ci vai mi biloh gui mi hngu hnging ci.
Acun ah mi bi a phäh ah ngtói ne om lo ci cuh shekà lo píhtî ca a nggónggài gui pô-hlâ ngtüì om lo neh khlái ba hngá neh kchàng gui ah a nglak ung. kbàn neh bî ba hngá nak hlü lo ba ci.A mät ah a ngtüîpüî ah a biloh a tah kchàng gui noh kbàn neh ami bîloh gui hnguh lô píhtî ah a kya ung acun ah phäh ah ngtüì om lo khai ah kyihkyok kshé ci gui mi mà lo na khai.Ashängshäng ci vai ah a nggónggài tumat gählêi vai ah kchàng gui noh a nglak düt ung kbàn neh ami bi a phäh ah a kat lô nak píhtî mi hngu u neh acun cuh kdäih neh ngvèing neh a om lo cuh mi hngu hnging ci.Avai hlü ah pyéin ah akya ung mkyüt mshih sèi gui cuh géikònak ah phäh ah mangcâ phya tê ci cuh kkhá gui on atäng ah ngpòng neh om ci gui ah mkyütmkyap akkhak cuh akkhúi púm ah maih hlak ci.
Acun ah a hngùn kghìng gui a dí chük maih-thàm ah phäh ah ami bîloh màmòòng gui hêi tu hngá ca nì lam gui on mthong neh mangcâ lo ah akya ung acun ah nì lam gui cuh kyihkyoknak on kä ngcha neh a kya cuh mi hngu bà mä ci.Kchàng gui ah phäh ah ngtüì om lo ca a nggónggài gui gä-hlêi vai kthá na neh bi ci gui ah htikpán hnguh hmat kchàng gui engineer gui noh kthá na neh ami bîloh gui cuh shüm hmat neh mtâmmkhah gui vai ah kya ci.Shin ah khòmdek ah a mòòng lam gui mtùmtäng mtàgá neh ngah-tüh ah akya ung kchàng gui ah a nglak düt ung kbán neh ami bîloh ah a ngnüt ngdòng cuh hlùmmlèi mòòng bilô ci gui lah khleihshu neh mangcâ ci gui ah a nî bä nak vai bäng ah kya neh tat-lah pyinnya mòòng lam gui lah khoh pyân myung kthá a däm tài lo gui mi hnguh tu láng pâng a phih kùmkyüì nglêilài ah khoh-tang gui kchongkhagah khai maih hlak neh a kyómhtàng nak gui díshùm hlak ci.
Mikmi ah tengmkêin ngah-tüh nak ung a hngün thung ba neh kä gah hnging ah a ngtüî püî ah a kyómhtang nak gui cuh mi mät düt noh mi pyânthàm ah kyómhtang nak on mthôn vai mi kthá na ci vai hlü ah kya ci.Ngphlän pyî ca khòkum kthùmkip mkù ung lèng neh Kchòkhò ah mghó mshih sèi gui mi mang ah phäh ah a kyihkyok kshé gui cuh u noh ktäih neh kä teng hleih kä mi hmat ci.Ayan pùghí pa gui noh ami bi màn ah kut on mghó môi neh nglín,kkhìm,mhà on kä gählêi ah mghó mshihnak ah sèi on kphyût düt neh kä bóngbài yáicâ vai ah aktôi düt ah teng neh mi bi ci.Acun ah mi bi cuh mi kthá hlu ah kya ci.Acun ah séi ah phäh ah khòmdek dí neh mdek kshîn akní gui akshé ah nglat yop ci.Acun ah sèi ah kyih kshé ci gui cuh khò a â lo ung gäng tûi noh hteh hleih tûikhong khmòiyûng ah gok neh a m’äm gui cuh pìgò kchàng gui ung gok ci.Kchàng akdá noh acun ah sèi ah phäh ah apuk pôi akshô mneh neh ngkùng neh shi ci dá lo ci ci ci gui.Acun cuh kya hnging ci lah kä kya hnging ci ktäih neh ngshikcà neh mghó mshih sèi gui mi nong vai khin lo ci.
