Bä ciah Pontian lah Hippolytus ah ghünlu a mong

 Bä ciah Pontian lah Hippolytus cu Christu kum 230 ung Papa Shangpughang ah kya lo ci.  Eikarit Shangpughang Maciminus ah kalu nak a k’htük ung a ni cu Sardinia ah a mi got täm ah kya ci. A ciah gok ne a ni cu yaica nak gui a k’daa buiawt ciah kya ci. Christu kum 236 ung a ni ah bi loh nak ung ka no m’düm u ne htung awn m’ghuih ne a mi ngon ah kya ci. A ni ah cu Bä ciah Calistus ah m’dek kaa m’cümhngün ung a mi kuu ghon ne a  mi ci ah kya ci.

Bä caih Hippolytus cu Roma Mânggo ung ka hnguh hmat k’chang Taigü Boi tumat ah kya ci. A ni cu Bä ciah Lawrence Thong khui ah a mi ghon yah ung ngäng m’htei ciah kya ci. A ni cu Bä ciah Lawrence ah phäh ah a m’lung k’nga ng’thong hlat lo ne m’shi nak Sacrament tu cu la tu ciah kya ci. Christu kum 215 ung a ni cu ( Apostolic Tradition) guk ciah kya ci. A ni ah guk nak ung Taigü Boi ah kya lo nak ( Ordination) a mong lah a k’htük ah a mi läklam gui, a mi k’taigü man gui ah upatei gui cu a guk ah kya ci.

Bä caih Hippolytus cu Ng’chuh nak gui ah ng’kho ung ng’hton tu ne kya hleih Papa Shangpughang ng’hngu ng’tuk püi ciah k’chang ci ngo ne a mi pyein man ah kya ci. A ni cu Christu kum 235 ung Papa Shangpughang Pontian awn a täng ah kho phung a mi got täm goi ah kya ci. A cun ah a mo gottäm nak ung a ni cu ng’hle awn a k’pit a m’ton ah kya khai ah a mi ngon ah kya ci. A ni ah gook cu Tiburtina lam k’khan ah om ciah kuu ung a mi ghon ah kya ci. A ni awn a ni ng’ming täng ciah Taigü Mâng tumat cun phih om ciah kya ci. A ni cu thuuk nu ciah tui k’büm ung shum ne a mi ngon ah kya ci.