M’Dèi neh güng ci-ah k’chàng gùi.

 Nami ’chéi hlòp neh nami kut-ung mei k’däì ’kot neh om vä.  Ami Báwi cuh, chú m’dònnák-a kah, a gok lo bà- ung k’soh a k’tén-ah ami k’hmón péit vai-ah ngäng ci gùi-a hlo-ah nami om vai. Ami Báwi a lo bà zah-ung ng’süm neh om ci gùi cuh, bä ci gùi. Nangmi-àm a k’càng-ah ka piéin cuh, ami ’chéi pìn neh ngamí ngoh hlak gùi neh èi m’bèi gùi khai.  Mü-thài boh, mü ng’lùng-ung boh, a lo bà-ung, a cun-a hlo bä-ah ng’süm neh ngäng hleih a hnguh-ah phàn-ah k’chàng gùi cuh, bä ci gùi.  M’Guk èi a lo zah vai cuh, im-mah nawh a hmat-ung, a im-ung, kä lut-èin hlot khai-ah, ci khai cuh, nami hmat vai.  Cun-ah kia hleih nangmi phih, ng’piàng thãm neh kia vä. Nangmi nawh kä nami ng’ngaih-tüh zah ung k’chàng-ah Htá lo khai.Petru nawh Báwi cuh, ng’si lo neh “Báwi-aw, sin-ah m’tu m’tängnák cuh, keimí kavai-ah mä, kä cun-ung, avan kavai-ah mä” ci ci. Báwi nawh piéin neh “Immah nawh im-’kiàwng-a kah gùi cuh, m’ei m’áwk neh bi-loh vai bi-lo khai-ah, a k’hmoh-ah k’chàng cuh, a u-ah kia khai-ah na ’ngài ci-ang?” Báwi a lo bà zah-ung, a cun-ah bi lo hleih a hnguh läí cuh, bä ci. Nangmi-àm, a k’càng-ah ka piéin cuh, a mät-ah khawh gùi-ah ’khãn-ah ani cuh, k’hmóh khai.  Phàn-ah k’chàng tumat läí nawh a m’lùng-’kiàwng-ah, “Ka Báwi kä lo bà pha ci,” ci neh piéin neh phàn-ah k’pámi gùi, phàn-ah k’hngumi gùi cuh, lèng neh tuthat gùi neh èi aw neh èi-aw k’tat ci.  Kä ng’ngaih-tüh-nák-ah k’hngüp, kä hmat zah-ung, Báwi cuh lo bà neh ani cuh, m’cha neh phàn-ah k’chàng k’sé gùi-awn thà tu khai.Báwi-ah ng’zák hlü hmat neh kä piàng thãm, a ng’zák hlü-a hlo-ah kä bi ci-ah phàn-ah k’chàng cuh akia-ah thah-ah kia khai. Kä hmat neh thah chin vai bi ci cuh apí-ah thah-ah kia khai. M’ùm neh péit te-àm, m’ùm neh san bà-ah kia khai. M’Däm pui neh m’äp te läí-àm, m’däm pui neh san bà-ah kia khai.