Tûi kä ngkyüh lo ba ah mòòng
Mi ók ah tûi cuh kchàng lah kkóng k’om tûi k’om gui ami ghin vai phäh ah kä om ung kä kya tu kcàng ca kya hleih tûi kní tûi kthéing gah nak cuh aktúng pí tumat ah kya ci.Tüi kní tûi kthéing gui cuh gáigong mòòng,géitkò mòòng lah cíngcì im gui ah phäh ah hlü ci. Ayân cuh ngyák hlü ah tûi mi gah màn te ci hngün akdá ung gah hnging ah tûi a tah mang hlü ah tûi cuh dá lo tu ba púipúi hleih ashô ayät ah ciah a ngkhap a ngtaih ah mòòng lam gui mi bùi chúm tängtäng khai.Tûi ami têipâi yîhngêi ca mânggò nú gui ung ashängshäng tûi kä ngkyüh u neh ami yáinak ah hngù ah peta tu ba hnging ci am mkúnak tu ba mi bùi shàn ci.
Tûi akènnak cuh Africa ung akdá pí ah mi bùi ci.Africa ung kchàng akdá ka vai tûi kní tûi kthêing gah-tangnak gui kä kphâ u neh géitkó biloh màmòòng gui plohkheih ca khò a kängnak ashängshäng bùi ci gui.Amshah ghunkhò gui ung tûi dá neh amshah ngdühngün gui ung tûi kèn ci.Kä théing ca tûi lah natnak gui.29.Aktúng pí ah nggónggài ci tumat cuh akdú gui noh a i ah hlô ah tûi ami gah ah kya ci.Ngami cuh akhngüp tä hleih ci vai a m’äm gui thüh ca tûi ami ók ung ka noh shihkyuknak gui,kä théing ca tüi on ngdün ca mnehnak ahlühlü a pôknak tûi ung thüh ca tátuh khoh gui on ngdün ca mnehnak gui cun phih bùichúm ci gui.
Pôi natnak lah pôichònnak gui cuh tûi akní kä gah nak kä théing ca tûi óknak ah kya neh acun ah phäh ah kchàng gui yáicâ u neh akhmó gui akkhak shi ci gui.Ngdühngün akdá ung aktúngpí ah upatêi khännak on mhtéinak kä om ca hngün gui ung lung htattuh cohnak géitkònak gui ung tatkshîn(ဓာတ်မြေသြဇာ)lah mkyüt mshih sèi mangnak,cíngcì bilohnak gui ung thüh ca tátuh khoh gui a phäh ah mdek kkâ ah tûitô gui lah mdek cô neh láknak ah tûi gui phih a théinnak kên hlak ci.30.Tûi kthéing gahnak akên lô ah mòóngTûi kthéing gahnak kèn lo chütah amshah yah ah tûi a maih lo ghepghep yah ung tûi gah nak hnging ah hngün gui ami mät ka vai kana u neh hlùmlèi na ci gui.
Kchàng gui ah ghin nak vai aktúng ah hlü ca tüi kthéing gahnak cuh kchàng päng ah phäh ah gah khîn ah kchàng ah mkot lam cuh kchàng kdú gui ka vai ami gah vai ah kä bi ah kya neh khòmdek cuh kchàng kdú gui ah kkhân ah kchàng hlû mòòng pûngponnak gui om ca kya ci.Cun ah pû ngpon thúng hnging vai tûi kthéing gah hnging vai lah dúkhaih ci gui gungkûm vai phäh ah ngúi mcutnak lah gunghtótnak mhngá neh thànak on ateih thúng hnging vai kya ci.Cung phih ók ah tûi kä gìchát neh plohhtah nak gui cuh tûi akdá om neh ngmang ca ghunkhò gui lah däm tài yah kshùng ca ghunkhò gui ung hnguh hnging ah kya ci.
Acun gui tengnak on tûi gah mòòng kä tàgának lah tûi plohhtahnak ah she kà ci ah a ngkhap ngtaihnak gui mtúng neh ngngaih nak akèn ah phäh ah tûikthéing gah móòng ah a nggónggài on pahtak ca hnguh hmat mthêi bi ngtäp gui lah thùngyò mhtéimhtà mòòng a hlünak mdáng ci. 31.Tûi akènnak cuh tüi yîhngêi ca khohthêm gui lah êi ók gui cuh a phù akyüìnak lam täng ah bü ci.Hnguh hmat kchàng gui noh ami na ngngaih nak hlak gui cuh shin ah a nggónggài gählêi vai phäh ah ktúng na neh kä bi ah a kya ung kum phyaghà ngbûm apí ung tûi a ngcétnak a kchün ah bùi vai ah mòòng na mthêin gui ci.Akhòtüî pèingléng adínak kchàng käp akkhak noh bùi khai kya ci. Ahei ngah-tüh vai tumat cuh ghunkhò akkhak ngpòng neh hlùmlèi móòng bi nak amshah cuh tûi gah-tangnak ami shûm ah phäh ah shin ah kum phya ngbûm ung shin ah a nggónggài on pahtak hleih a ngcétnak gui mi bùi hnging ci.
(3)A hngùn kghìng gui a cìn dí vai ngkyihngkyok nak32.Khòmdek khoh-tang gui cuh ashäng aktôi pongpüînak gui on ami mät ah aktén ah ami ngyák hlü shùi ci gui ah hlùmmlèi mòòng yoih-tuk mòòng khohthêm pyânnak ah biloh gui cuh. ami ngngaih ah plohhtah ci gui.Shingghìng gui adí shùmnak cuh mà.lam ah kchàng gui ah phäh ah kthûi an,êi ók gui lah sèi lam mang ah akghìng gui,ahêi mang vai hlü ca akghìng gui dí shùm hlak ci.Shingghìng ahlühlü gui cuh kchàng gui ah a hlünak abé vai lah akhòtüî pèingléng mhtéi vai phäh ah ääp vai ah shämkò ci gui.33.Shingghìng ahlühlü a hngùn kghìng ahlühlü gui cuh mät ah gah-tang vai phäh düt teng neh kä gah ah kya ci.
A hngùn kghìng päng ung ani on ngkhîngngkhông ca tanphù gui om ci.Akum tä hleih ci vai ah phyâ kkhak lo ca shingghìng gui cìn neh maih chütah cun cuh kä mi hmat neh mi htá nà gui noh kä hngu tu khai gui.A hngùn kghìng gui a cìn maih cuh kchàng gui ah kya ci.Mikmi ah phäh ah a hngùn kghìng kkhúi phya kkhak phlän ci gui cuh Kkhânpùghí kä mtâm hnging u neh ngami noh Kkhânpùghí noh a péit hlü ah ngthêingthàng hnguh hmat nak gui kä mi gah ba khai.
