MIKMI VAN-AH NU LAH SHANGPINU-AH KIA CA MARIA
Boi yeisu noh anu Maria cuh mikmi-ah nu-ah akia hlak-ah hlo-ah acu k’hngüp a shing m’kang k’ka-ah om ca anu lah k’chang k’bä yohan-am nang nu na hta teng-ä, na nu teng-ä ci neh phih pyein ci. Cun-awn cuh yumtu ng’bum pum-ung om ca hta k’hngu hta k’pa gui van noh Nu maria cuh mi nu nak tu ca kia ci.
Nu Maria cuh ayan tün neh yumtu ng’bum-ah nu-ah kia ge ca kia ci. Hti theing neh k’hmo ca ng’lami tumat-ah kia kia tu lang neh Khanpughü-ah pyein cuh äi ci. Ma neh gah tulang neh Khanpughü-ah pyein päng bi vai neh yum neh äi ci. Ani-ah yum nak ng’ngaih nak , m’hngi nak gui-awn mikmi gui na k’phyawn gui khai-ah Boi yeisu cuh kho m’dek khan-ah khah lo püi ca kia ci.Nu Maria cuh Khanpughü noh a pa k’khui-am apeit-ah k’chü khän cuh m’kyüm k’be tu pe ca kia ci.
Khanpughü noh bü ceng ge neh Boi yeisu ang’pyi kon-ah ani cuh nu pa k’htük-ah kat nak kä om-ein hleih ng’tüi ca kia ci. Nu Maria cuh m’shi nak Secramentu abi tu vai kä hlü ci. Khankho ng’shä Cabrie noh a pyein lo nak ge-ung ni bä nak gui-awn be ca Maria Shangpinu-aw na yei tu vai nei ci neh pyein ci.
Nu Maria cuh kho m’dek khan nah yeisu hta na neh kat nak kä boi-ein hleih a hting ling-ah om ca kia ci. A ni cuh yeisu ana thak lo gui hlo-ah mikmi cun phih yeisu-ah na thak gui ci. A k’cum-ah apyein-ah k’chü cuh kat nak ami bi nak gui ng’düm vä ci-ah k’chü m’kha-ah kia ci. Suh mi shan-ung ani-ah mi shang ci. I kia hleih ci-ung ani-ah pyein cuh ahta yeisu noh ng’ngai ca kia ci. Nu Maria noh hta lak nak-ung tui-ung ka noh capyitui-ah yeisu noh am’thong vai-ah ashan-ah hlo-ah mikmi-ah ng’hui nak gui cun phih na shan tu pe gui khai kia ci. Khanpughü-ah yum aläk-ah k’phei-ah mikmi gui noh ani m’hngi yei nak u neh m’hui-ung khanmopi im täng cuh lam na m’shüm tu gui khai kia ci.
Nu Maria noh ang’dang nak päng-ung apyein cuh ng’yu ng’yawn ba vä, ka m’hngi gui-ah ka hta gui-aw ng’ngai vä, I noh phih nang mi-ah m’lung cuh k’tha kä sheit-ein hlak hlä. Goi ge nak ,ng’ä ng’cäi nak gui thüi hlei m’neh m’oh nak gui kä kyüh-ein vä. Na mi-ah nu ka om ca ci nei . Ka k’coi-ung ni k’pawm gui neh ka hlui-awn ka ning pin gui ci nei ci neh ana m’hngi nak gui ,ana m’htei nak gui cuh m’dang ca kia ci.
Ani m’hngi neh ng’hui na neh om ca k’chang gui phung cuh angoi-ah phih kä nong düt khai. Khannopi im cuh k’hmuh tu khai-ah kia ci.
