Pâhtâ gui on nghtàngkònak 2
Kchàng phùngphùng cuh nghtàngkò neh kchì kkyò haya ci.A khngät cuh thüì kyap neh vîk mlâ ci.Vúkhòng neh ng’äì ng’om ci.Acun ah om ca kchàng akhak lènglèng ung ung ka vah Bói Jesu noh ani ah hngú läk vai ana ghü gui ah kya ci.Ana chü thäm gui ci nak ung kchàng gui ah hlô ah hnguh tèngtèng ah na lo shí gui neh a na chü phòng nghtàngkò lo püî gui ah kä kya ci.Mlùng khngà ngah-tüh nak gui ung a düm kyäp htá ah akkhâng na pe gui neh lam na mshüm gui neh a na chü phòng ana nghtàngkò püî gui ah kya ci.A cun ah ana chü phòng nghtàngkò püî gui noh mi ngkho kchàng mi teihpüî mi ngkhô kchàng gui mä i hngo kchà mi chü phòng tu ba hnging khai ang?Cun ah kchàng gui kä mi chü phòng tu ba gui pha ung a i ah mä mi ponghtêi ngpyàng ngtham khai ang?
Bi tumat bi lo vai ung ponghtêi ngpyàngngtham nak cuh aktúng ah kya ci.Bói Jesu noh a i a thêimthàng lo ung phih khòmdek ah kkhân ah om ci gui on mi biloh gui on mtùmtäng neh na mthêi gui ca kya ci.Akkhâng on a mtùmtäng nak,mshî on a mtùmtängnak,lam on a mtùmtäng nak akkhak om ci.M’gu k’èi,kchàng kthá ngshüí,kchàng kshé ciah kchàng a hlühlü on a mtùmtäng nak gui phih om ci.A cun ah a mtùmtäng nak gui ung mih-mik Kchò gui noh Kchò thùng on mi ngah-tüh vai gui ah mtùmtäng nak gui phih om ci.Avai hlü ah I am the corner stone ငါသည်ထောင့်ချုပ်ကျောက်ဖြစ်၏ ciah a mtùmtäng cuh Kchò thùng ah pyéin ah a kya ung gâi ktùng ah kya ci.Mih-mik Kchò gui cuh Kchò im mi coh lo ung ktùng akdäm pí,a k’yäih pí a ngchüih pí cuh gâi ktùng ciah mà neh mi nglìng ci.
A cun ah gâi ktùng cuh valoh ktùng ci neh amshah lòngthà gui ung pyéin ci gui. Ami pyéin hlü läí cuh a ahêi ktùng gui nglín lo ba vai a kya ung acun ah akní pí ah ktùng ung ka noh ngyung netah nütdòng mteih mcoih neh coh ah kya ci.Ayân Kchò thùng ah mghûngthâ neh avan ami om yah ung acun ah gâi ktùng nglínnak täng ah hlik hngòng voihpeh nak thà neh aktúng ah biloh eî ók gui cun phih khò gâi täng ah bi ci gui.Acun ah Kchò thùng ah coh-ngphlàinak ung aktúng pí ah kya ca gâi ktùng cuh ahei ktùng gui nglín lo nak ung va loh nak ah akya ah hlô ah ngmùimchà lam lah ahei biloh nak gui ung aktúng pí ah mi yîhngêi ûpâ vai cuh Bói Jesu ah mi hmat vai kya ci. Pahta ah mòòng kchàng gui on nghtàngkò lo vai ung kyawng gui ung ngthêingthàng hnguh hmat gui:ngah-tüh mtumcoih nak gui lah ahei ca ngbú gui ung hnguh hmat kchàng gui ah mthêi mcäì pyéin hlak gui bäng yùmnak neh ngyung khong na neh pyéin vai ah mi ngah-tüh ah akya ung púm kyä lam bäng mi äp ah kya neh ngmùi mchà lam tùng gâi im ktùng Jesu cuh mi mchüh khai kya ci.
