HIV, AIDS-AWM GO PAI CI GUI GUNG TU NAK GUI-AH MONG
Titah lah Mary ng’ming nak ca ng’chu ng’la goi-ung ani hta gui k’hma om neh ngani cuh dim kyäp ca k’kyong khui-ah kia ci. K’khanpughü yum ääp ci goi-ah ng’chu ng’la goi-ah kia ci. Kho k’ngüp ät-ung pigo k’kyong kah ng’vai gui noh geit ko nak gui ani lo pi hti vai-ah ng’thei ng’tham nak gui abi tu vai-ah Titah cuh pyein nak ci gui. Cun cuh ani noh phih yum neh äi hleih mang go-ah tüi ci gui.
Mang go-ah a gok nak k’cha goi ng’lak lo na hleih k’chu khaih nak neh k’hnguh mi gui-ah mong ng’ngah tüh lo ci. Ami ng’thei ng’tham nak-ung a phe phe-ah kah a teih püi gui noh k’phung-ah hteh vai phong tu u hleih phih dam ci. Cun te mü ät-ung I kä kia ba thei neh ng’ läk tu ci. Ei awk neh yei kiai u neh ak’hngu-ah kani ca k’hngumi gui-ah om nak-ah goi u neh käni ca k’hngumi tumat-awn ip ci goi. Khong ngoi-ah let lo neh a yam mü a kat te cuh ng’yu ba neh I-ah -ung kä kia ba khai ci-ah ng’bäi ci.
Ami ng’thei ng’tham gui ng’pyi hleih Titah cuh im-ah lo ba ci. K’cha goi vai ng’lak na hleih k’chu Mary cuh kyä mah lo tu ba ci. Cun yah-ung leng neh Tetah cuh akyä m’neh lo hta gui ci. Ma neh bong bai neh a k’tha ng’shüi ci. A kyä phih yang lo ci. A kyä phih ng’bäm hta gui neh phyuit lo ci. A poi phih a shäng shäng chawn lo hleih Sei bawi-ah hteit neh k’hmuh tu ci. Sei bawi noh teng lo neh ani-ung HIV go nak om ca mong lah k’chu-ah poi k’kyong kah k’hmo hta-ung phih om hnging ca a kia-ah mong cuh m’thein ci. Sei bawi noh HIV,AIDS m’kyüit cuh shi, ng’yo ng’pawm nak, kyä k’kyong kah lut lo ca atui gui ni, hluuk tui-ung ka noh phih ng’pek hnging ca mong cuh k’püh k’cheh yah m’thein tu ci. Cun vai-am tah Titah cuh kä ni ca hngumi tumat-awn ani ih te cuh shäm ba neh ng’ä neh cat lo ci.
Tetah cuh hteit ba neh kä pyein tu hlü lang neh k’chu-am m’thein tu ci. K’chu Mary cun phih cäi neh kä yum hnging ci. Säng säng chü tah thüi phih thüi ci, am’lung phih se lo ci.
Mary cun phih HIV go nak kä om lah aom sei im-ah hteih neh teng tu hlak gui hleih ani-ung phih go nak om püi ca akya-ah mong cuh m’thein ci gui. Cun-ung kah hnguh hmat ca ng’vai gui noh kyä tak mah-ah kia yah-ung sei gui ei awk hnging-ung puk khui-ah k’hmo-ung HIV m’kyüit kä pek hnging ca mong cuh m’thein tu u hleih ani cuh sei im-ah ak’cum-ah hteit neh sei gui ei awk nak-awn ak’hmo hta cuh gai gong hleih hta na na hnging ci. Cun te Mary cun phih kä gai lo ba hta gui ci.
Tetah lah Mary cuh ani hta k’hmo k’chuk lo ca kia hleih i ani kyak vai kä hmat-ah kia ci goi. Ei awk-ung kho kum k’sho m’dün nak vai-ah sei ARVS ci-ah sei cuh om ca hmat tu lang ni neh phih cun-ah sei cuh k’tha a sheit vai hlu-ah ngani-ah om nak-ung kä gah hnging vai kia ci.
Ngani cuh ani go pai nak k’chang hngei gui noh ami hmat tu-ung ami teng m’sheit goi vai kyü ni neh u-am phih kä m’thein tu-ah om ci goi. A k’hngu-ah ani yai nak ka lo pi hti hleih tamasaya-am m’thein tu ci goi. Cun-ah tamasaya noh k’cha k’sho ngani-aw atäng-ah ng’thu k’theing phat nak bi püi goi neh ngoi-ah ani hta k’hmo gui u noh m’htei pe goi hnging khai ci cuh ng’ge püi goi ci. Ngani cuh ani m’lung k’kyong-ah ani ng’neh gui m’dang neh ani pyein hnging nak-awn ani m’lung dim neh gei ba ci.
Titah cuh ani-ah k’poih ba hngun a ghün nak-ung ani-ah hlo-ah k’hmo k’tho gui noh kat nak kä mi bi loh-ein tu vai-ah AIDS go pai nak-ah mong gui cuh am’thei m’thang nak tu ba gui-awn ghüng om ci.
Burmese Catholic version 2016
