Boi Yeisu ah müi hmai a ng’thong hlah nak ah poi
Boi Yesu cu yaica buiawt nak gui kä om pha ung Peter, Jon lah James k’thum gui cu chü ne Galilee kho ung om ciah Tabor m’htung ung k’taigü khai ah khai ci. A ni no ngami k’thhum gui chü ne a khah püi gui cu taga ciah uupatay awn k’chang gui ah mah ah khäng htek ne cang ciah a kya vai ah phäh ah kya ci. Peter cu yumtu ng’bum ah khong mang k’chang ah kya ne ngami awn a täng ah om ci. A k’ten hta ah Boi Yesu ah hmai cu ng’thong hlat lo ne kho k’hngi vai hlü ah khang lo ci. A hluihlak gui cun phih bok hta ne ng’dang lo ciah kya ci. A cun vai am Mose lah Elijah cu k’taimah nak awn ng’dang lo ne Boi Yesu awn a täng ah ng’hta ng’ko ne a mi kya yah ung Jerusalem Mânggo ung a ni cu kä sho pha hleih ng’kyüm be lo khai ci ah mong cu pyein ci gui ah kya ci.
Moses no taga ciah uupatay phih kyai, Elijah no k’ceng’shä gui phih kyai, Boi Yesu cu ng’thu k’pyhüm ung a ge ah a mi pyein te ah hlo ah Messiah Boi ah kya ci ci cu a mi m’dang ah kya ci. Ngami noh a mi pyein cu Boi Yesu yaica biawt ne shih ne ta a ghün lo ba vai a mòng cu a mi pyein ah kya ci. Peter no Boi Yesu am a pyein cu shin ung a kya ah om nak pyhak ci. Na ng’yakhlü ung ta, nang ka vai tumat, Moses ka vai tumat, Elijah ka vai tumat, phung k’thum ah mi tu ko, ci ne Yesu am a pyein kä hmat ne pyein ciah kya ci. Boi Yesu ah hmai a ng’thong hlah cu a hluläk gui k’thum ah a mi m’lung a yeikyai vai düt ah kä kya ne ngami ah maalam ah a mi bi loh vai gui ah phäh ah a pyan ah kya ci ci ne Boi mo pyein ci.
A cun a ci yah ung ng’mei k’khaang no shun gui ne, ng’mei hngu ah ka k’o no “Shin cu a ng’htei ah ka m’hngi ah ka hta nei. A ni ng’’ngai vä ci ci. A hluläk gui no a cun ng’yak u neta kyü u ne ng’bop ne a mi hmai thup ci gui. Yesu no k’et lo gui ne toon gui neta let lo vä. Kä kyü ein vä ci ci. Ngami no tä lo ba ne teng u ne Boi Yesu kon ah a u phih kä hngu ci gui. Ngami gui cu a mi m’gong m’kyüp u ne a mi hnguh hmat gui a van a u am phih kä m’tein tu ne om ci gui. Boi Yesu ah mik hmai a ng’thonghlah cu Boi cu Messiah Boi kya ci ci lah a ni cu Khanpughi ah hta ah kya ci ci cu a m’dang vai phäh ah kya ci. Cun kon ah Boi no yaicabuiawt nak gui kä hnguh pha ung a hlulük gui ah yum nak a m’khän peit gui ah phih kya ci.
