Pahta gui nghtàngkò tu ngkyunak
Interreligious dialouge 1Pahta mòòng yùmnak a hlühlü ah nglùng ah Catholic Htahta cuh om ca kya ci.Cun ah nglùng ah yu nghlôi va ngpán hleih hngiphngäî khai kchîkkyô thêi vai hlü ci. Mät ah hnguh hmat lah yùm bäng língkhapeng neh pyéin ah akya ung ngói güt khò ngshông ung bi vai ah kä nghlôi lo khai kya ci.Yùmnak kä täng ci gui on nghtà lo ung a i hngô kchà om ih vai cuh Bói Jesu noh na mthêin gui ci.Bói Jesu on a yùmnak kä täng tu ca Samaritan khngûmi tumat Yakuk tui kbüm ah tui thân khai lo ci. A cun ung Bói Jesu noh a i ah lèng neh a i ab a nghtà lo püî cuh mi teng shüm ko.Johan 4:4-10 Samaria hlùn neh hteit ci. 5.Yakuk noh a htá Joseph am a péit ah mdek ah péi ah Shikhar pìgò om ci.6. Cun yah ah Yakuk ah tûitô om ci.Jesu kbóng neh tûitô pèi ah ngo ci.7.Samaritan khngumi tumat tûi thân khai lo ci.Jesu noh ‘tûi na tu to’ a ci. 8.A hluläk gui cuh êi vai khleih vai neh pìgò yung ah hteit yah ci gui.9.Cun ah Samaritan khngumi noh”Nang Judeu kchàng ah kya láng neh kei Samaritan ah ók vai i ah na shân”ci ci.
10.Jesu noh a mshàng ba cuh Kkhânpùghí ah ngkháinak lah tûi ning shàng ci cuh na hmat vai hlü ung nang noh na shàng khai hlü. A ni noh hngùn tûi ning pe khai hlü” ci neh pyêin ba ci. Shin ah lèng neh ani nghtàngkò lo nak gé ung Jew gui noh kä nghtàngkò,kä ip om,kä ei òk püi neh pakkhûi hei gui ah thà neh kä hlüitä neh ami nong thà gui cuh lèng neh Bói Jesu noh a nghtà lo püi cuh Samaritan khngumi hngo noh cäí neh nghtà lo ba oüî ci.A cun cuh tengnak on yùmnak kä täng ci gôi nghtà lo ah a kya ung Bòi Jesu ung om ca mlùng m’yô mnêin neh hngiphngäî nak a om vai ngpyang ngtham vai hlü ci. A cun cuh teng nak on mikmi RC gui cuh christian ngpài gui on kä mi nghtà hlü veih cuh nghngungtuk ci vai hkü ah kya ci. Ngami cuh mlämkhâng neh akbäkbä hlok ah mghämvê u chütah mi gheih ah phäh ni RC cuh Bói Jesu noh a mdüih tu kcàng ngami cuh saya gui düt no ami mdüih ah a ngphyék ngpài hta gui ciah mi yùm ah phäh ah kya ci.
A i ah mäih ah a kya ung phih Bói Jesu mät hngô noh mikmi na om lo püî gui neh kat hta ghóng ah mi kya tu láng pang ah phih na yèi na gui neh ana nghtà ngkò püî gui ngah-tüh khenggeng neh ngami on nghlôi nghlak hleih mi nghtàngkò khîn ci. US ah RC kèn tu ba neh christian ngpài gui dá tu ba hleih ami om yah ung Sayataw Full Ton Sheen noh akní ah mthêimthàng nghtàngkò püî gui neh avan noh ami ngngaih tu hnging vai TV ung ka noh mthêimthàng nghtàngkò püî gui hleih christian ngpài akkhak lènglèng cuh htahtana ung ngdòn lo ba u neh yùmnak akcàng ung ghing om lo ci gui. Tuhchü cuh internet om lo hleih phone tumat on a u noh phih a hnguh ngyák tu vai nghtàngkò nghnguh nghmat lo nak ah kya lo ci. Akdá noh cun cuh akshé lam ah mang ci gui.Ngvóknak lok-lak nak,akshé ah omnak gui cuh akdá pí ah hnguh hnging ah kya ci.
Kkhânpùghí mi yùm tu kcàng ah a kya ung akní lam bäng ah mhlat neh mi mang ung yùmnak kä täng ci gui akdá cuh mi yùm ah Bói täng ah päng lo khai gui ah kya ci. Acun ung Bói noh Mateiu 5:13-16 ung a pyéin ah hlô ah mikmi cuh mshî lah akkhâng ah mi kya lo tu khai.Kä cun ah a kya ungmêi mdäî netah dòn on uk ci on mi täng khai ci ci.Mêi cuh avan kkhâng khai a ngdáng ah mdäî ah hlo ah nami kya vai a ci cuh a kkhâng lah mshî ah kya neh mikmi ung om ca Jesu cuh kchàng gui on hngiphngäî chütgok hleih mi nghtàngkò nak gui onkchàng gui ah ghinlù ung mshî ah túi neh khngì ah mi pyü khai kya ci.
