Ktàigü kthài 2(Ngthûkní ngthêi)
Ktàigü kthài 2(Ngthûkní ngthêi)Catholic yùm ci ktû avan cuh mühngün khò-ngói ktàigü kon ah phih kyün khngüp ung a ktúng pí ah ktàigü neh missa a gän ap tu vai ah màmòòng na ci.Acun ah htahtana ung om ci phùng avan noh ami ktàigü cuh Kkhânpùghí ah ngthû kthéing kyanca lah bä ca kchàng gui,htahtana khòngmàng ci gui ah mthêi mcäì ktàigü gui ah kya ci.Ngthûkní kyàncâ gui cuh pahta kchàng päng noh kä teng kä kkhêi yop hnging vai ah dá aih chütah aktói ah m’än neh avan ah ktàigünak ah ami lat ah kya ci.Acun ah kya neh pahta kchàng gui ah khngüp tä ktàigü gui cuh kyanca ah a ùi a ngyung,a kkhîng kthang shihlá ah kya ci.Kchò ngthû on pahta kchàng gui no ami ktàigü gui cuh Pyînhtit Bóiphàyà gui noh ami pyân ah kya ci.Pakkhúi hêi ung ka gui noh Kchò kchî akní ah kä hmat ci gui noh ami mchüt hnging ah ngthêi tu neh kthá na neh ami pyân ah kya ci.Cun tu láng pang a phih ngdükhò kchàng gui ah ngngaih ah yümyüm ah kä nghlôi hlot ci.
Tuhchü yùm ci ktû Kchò kchàng gui ung phih christian yùmnak ah mòòng kshíng lo ciah ca hnguh hmat kchàng gui ngshoih lo ca kya neh Kchò ngthû khtüm ah ktàigü vai ah ngcôngphyót ca Mvá kchî nglung ah hngün ung ami mthôn ba ah kya ci.Ashin ah mòòng mà kbäih neh guk nak ung Kkhânmòpí ah om ca kami ning Pá o lah Pá nî,Htá nî ung ngcô tu ca Mvá kchî nglung ah mòòng guk pyi ah kya ci.Tukbäih na yèi tu vai Maria o mi teng shŭm ko.Na yèi tu vai Maria o,a nghtéi khmà ah na bä ci nei. Kkhânpùghí mät ning om püî ci.Khngûmí gui ung nang noh akní pí na gah ci. Na htá Jesu no phih akní pí gah tu ci. Kkhânpùghí ah Nú htíthéing ca Maria o,hmà kkhät ca keimi gui a phäh ah a tuhchü lah kami shih lo vai ung na nghûingpâ tu pe gui ä. Amen.Shin ah ktàigü nak läí ung Mvá kchî nglung a bòi nak kä dá ci.Ingkalik kchî on (for us sinners)cuh hmà kkhät ca ciah ami kphlànnak ung hmà cuh Mvá kchî a phih kya neh sinners cuh hmá kkhät ci ciah phih ayäih ah kä ngphlàn chütah katmah kêimi gui ciah ayäih ah ami kphlàn ah kya ci.
Cun kon ah akhngih nak ung ngcô ci cuh suh na shân ciah kchî nglung ah kya ci. Ingkalik ngthû ah pray cuh Kchò kchî ah nghûingpâ ah ng’et neh nghlôi tu ba hleih na nghûingpâ tu pe gui ä ciah ami kat ba ah kya ci.Cun kòn ah Kkhânmòpí ah om ca lah na yèi tu vai Maria kon ah ‘Pá ni,Htá ni lah Htítgéing ca Muh cuh kami mtâm ci’ ciah ktäìgü läi ung Mvá kchî kä bòi hngá ci.Shin ah ktàigü gui cuh ktàigü kphyìm gui akní ah nghlói hleih pyéin mih ci gui ah phäh ah kä yùm veih ci gui phih om ci.A i bä ah pyân ba laih laih mcû màn khläm ah mcû ung gah vai láng hleih ci ci gui phih om ci.Cung phih Kchò noh Kchò khtüm ah ktàigü cuh ni tu ba khai ciah ami pyân ba ah kya ci.
