Bä ciah Lydia ah ghünlu a mòng
Bä ciah Lydia cu Christu kum 1st century ung ng’tüi ciah kya ci. A ni cu Mayan hluihlak gui yoituk ciah k’hngumi hta tumat ah kya ci. Bä ciah Polu Khanpughi ah mong lam a thähla m’thei m’thang yah ung Lydia cu Polu no a ng’htoi tumat ung a tha tu ah kya ci. Lydia no a yoih tuk gui ah mayan hluihlak gui cu ng’büh ng’mang k’chang gui no a mi mang ah hlui hlak gui ah kya hleih a ni cu ng’büh ng’mang k’chang tumat ah kya hnging ci ci ne a mi pyein ah kya ci. Lydia lah a ni ah teihpüi Aegean tui nu (Aegean Sea) ung ka no ng’plon lo ci gui ah kya ci. A ni cu ng’büh ng’mang ne hlumlei ci gui ah k’chang gui no phih a mi m’nai tu ah k’chang ah kya ci.
Lydia cu Christian gui no a mi ng’khai gui a mong m’dang ciah k’chang k’bä tumat ah kya ci. A ni cu m’shi nak Sacramentu a khan tuk on ah Polu lah a ng’toi püi gui ah k’chang gui a ni ah im ah hteit ne a mi om tu vai ah chü thäm tu gui ciah kya ci. A ni ah om nak ah im cu däm ne a kya ah ng’shawng ciah kya hleih om tu ci gui a kyäp ah ip om tu hnging khai gui ah kya hleih a cun ah phäh ah phih a ni cu ng’büh mang k’chang tu mat ah a mi ng’ngaih ah kya ci. A ni cu a im ah hteit hton ne om tu ci ah khodung ah ka gui phih a k’kyawng khui ung om ät cia gui vai hlü ah do gui ne m’ei m’ok, a k’ni ah k’chin k’pyha na gui ci. Mät ah om nak ah lo htei ci gui a u phih a k’ni ah k’chin nak cu a kya ah bä ciah mät ung om ciah kyesu ah kya ci.
Philipih ung om ciah yumtu ng’bum cu Polu no a m’düih ah yumtu ng’bum gui ung a k’dämpi lah ni tu ba ciah yum tu ng’bum ah kya ci. Lydia no ng’khai ne hteit hton ci gui a k’khin gui hnging cu Polu no Khanpughi ah mong lam gui thähla m’thei m’thang ne bi a bi nak ung a kya ah ng’hloi ciah kya ci. Phihpih k’cahng gui am m’khäh ca a guk nak ung “kei cu nang mi ka ning shüm ba gui tä hleih Khanpughi ka m’tam ci. Kei cu nangmi a van ka vai ka k’taigü yah ung a kya ah yeikyai ne ka ni k’taigü pe gui ci. A I ah kya hleih ci ung kei cu Khanpughi ah mong lam thähla m’thei m’thang ne ka kya yah ung a htäk ge ung ka no leng ne tugüt chüt hleih nang mi cu kei awn a täng ah na ng’toi püi ne na mi na bi püi ciah kya hleih ka ni m’nai gui ah kya ci” ci ne philipih (1:1-5 ) ung guk ne a m’khäh gui ah kya ci.
