Mät Noh Mät Ng’ngon Nak Gui-ah Mong
Pingola kho,ahtun täng om ca pigo tumat-ung Vikta lah Marian ci-ah ng’chu ng’la goi cuh ani hta k’phli-awn a täng-ah om ci gui. Vikta cuh ami kho-ah phäh-ah bi bi ca k’chang tumat-ah kia ci. Marian cuh hlui hlak hta gui yoi tu neh k’kong khui-ah phäh vang tän-ah ngui ghui a gah vai k’tha na tu ca kia ci. Ngani cuh Christian goi-ah kia neh kyün k’hngüp täi hleih kho im-ah hteit neh yei kyai ca ni tu hnga ca k’kyong khui-ah kia ci. A k’hmo k’thum cuh phih kyong m’kai tu neh pm ci gui.
Kho k’hngüp ät-ung avan ng’lat yop ci. Vikta cuh ma mong-ah lo ba neh im k’kyong-ah ng’däih neh htit hleih hnguh neh a k’chu Maian noh i akyak hmat hlü neh k’tha nak ci. Mü hngün ei ami ei kon-ah k’hmo gui ip u chü tah ak’chu noh ng’shi hleih phih a pam cai-ein vai k’she na neh amät ip ci. A ngong cih tuh kia lo hleih bi abi nak-ah noh ami k’htät cuh m’thein tu ci. Mongo-ah kah ng’vai tumat lo neh bi bi k’chang gui ng’bum m’thong ba vai ci neh k’chang am’sah a htät-ah mong cuh ak’chu-am m’thein tu ci.
Pat ät vai ng’lak na hleih vikta cuh a hngei ma mong tumat k’tha na neh shui tu hleih phih kä hnguk ci. Cun yah bä bä-ung ami om nak kho käng hleih a geit ko gui cun phih di yop ci. Bä tu ba ci cuh k’chu Marian-ah hlui hlak yoih tuk tu gui cuh ng’hloi ng’hlak lo ci. A mät-ah shäm-ah seng hta phih k’hmawng tu hnging ci. Marian-ah gah-ah ngui-awn ani k’kyong khui cuh ng’hloi hleih om ci goi.
Kho asho lo güt Marian cuh Khanpughü m’tam neh a gah ng’hloi hleih abi-ah mong cuh yei neh ak’kyong khui m’htei ci. Cunte acei Vikta kavai lei suh kä shang hlot ci. Ani cuh am’lung k’tha ng’kya hleih ng’hta-ah phih kä ng’hta ba hlü ci. Ei phih a kya man-ah kä ei ba neh mü-ah phih kä ip lo ba ci. Cun cuh Marian-ah k’tha pe tu vai neh k’tha na tu lang hleih phih kä ng’hloi ci. A mät hta bäng ng’khoi neh om ci. Ak’hmo hta gui ng’gü ng’lah u neh ami k’pam cai-ung phih k’she na gui neh k’düp-ah
ami om vai pyein ci.
Kyong kai nek vai ngui gui kä k’hmüt lo ba hnging hleih ahta goi kyong-ung ka noh ami k’htät goi. A cun goi-awn im-ah acum-ah om ghüt ci gui. A hta goi a dan goi-ung apa noh i hok k’cha k’tha naneh kyong am’kai gui man te cuh shüm ba neh amät noh amät i kä mong ca ng’ngai lo ci. Ak’chu Marin-ah gah bäng-awn ami ng’düih-ah phäh-ah phih ng’aa lo ci.
Kho k’hngüp ät-ung Vikta cuh yei thek neh kia ci. Bi vai shui khai-ah hteit khai pyein neh ahta goi phih k’chu-awm m’läk tu goi ci. Ak’chu cun phih bi vai gui khai hteit hleih yei tu ci.
K’kho awi-ah ak’chu Marian lah ahta gui seng-ah ami om yah-ung ahta ng’vai pi pakuh cuh im-ah ng’dawt neh lo ba ci. A gok lo ba vai-am tah shing ghüng-ung ng’awk neh sik ca apa cuh hnguh ci. Ak’chu ni, ahta ni noh i kia hleih mä ci neh ng’ngaih khak ci gui. Vikta-ah agawk phih am’shah yumtu k’chang gui noh kä k’phuh m’cim vai bung-ah ghawh dit vai ci hngo neh pyein ci gui. Ng’vai tumat lei noh ak’hmo gui kavai ng’ä pe gui ci. Kho k’hngüp ät-ung pakuh amät bäng om hleih hnguh neh am’lung k’kyong a thüi nak gui am’dang lo vai-ah gung tu ci. Cun-ah agung nak tu-awn sho lo chü tah apa-ah ng’awh-ah hlo-ah athüi-ah -ung akya tu kho lo k’ca akia-ah mong cuh pyein lo ci.Cun-ah ng’vai noh Pakuh-ah m’lung a thüi nak ni m’lung asheit nak gui cuh kyäp-ah ng’ngaih pe ci. Sho lo chü tah Pakuh cuh m’lung yei nak lah ääp nak gui om lo ba ci.
K’kyong khui tumt-ung shik ci aom-ung k’poih ba ci gui ami thüi-ah hlo-ah ng’awk neh shik ci aom lo-ung k’poih ba ci gui thüi pi ci gui-ah kia ci. I kia hleih k’chang gui ami mät noh ami mät ng’ngon neh ami sih-ang? Cun gui aom lo-ung mä I hlo k’cha gung tu gui hnging vai-ang? Ci gui cuh ng’ngah tü vai hlü lo ci.
