Bä ciah Alphonsus Liguori ah ghünlu a mòng
Bä ciah Alphonsus Liguori cu Christu kum 1696 ung Naples Mânggo a pei ah om ciah piggo ung ng’tüi ciah kya ci. ung Naples Mânggo ung om ciah nit u pi ciah kyawng tumat ung ca ng’thei tu ne a khokum 16 ung Law awn poih gah ciah kya ci. Christu kum 1722 ung a ghünlu ng’däih hleih a hteih nak vai ung yaica nak gui a ng’hteik ah buiawt ne a kya yah ung kho m’dek nong ne kei ah hngu ah na läk lo ciah k’o cu a m’lung kyawng ah ka no ng’yak ciah kya ci. Christu kum 1726 ung Taigü Boi ah kya lo ne a ni ah thing ling ne lang hta ciah a m’thei m’thang nak awn a ming thang lo ciah kya ci. A ni cu ka cang ne m’hteng ciah k’chang gui ah läk lam gui cu ng’hngu ng’tuk püi ciah kya ci. A ni cu kat nak ah phäh ah ng’yu ba ne k’pyhon nak ng’yak hlü gui am a cum ah kat k’pyhin nak pe ciah kya ci.
Christu kum 1732 ung Redemtoris ciah Boiphaya ng’htoi cu m’düih ciah kya ci. Bä ciah Alphonsus Liguori cu om k’ih lam ah hnguh hmat k’chang tumat ah a ming thang ne a ni no a guk ah (The moral Theology ) ci ah ca uk cu Papa Shangpughang mät no a k’bäi ah kya ci. Christu kum 1756 ung St. Agatha Mânggo ung Taigü Mâng ah kya lo ne yumtu k’chang gui lah Boipahaya gui a k’ni ah pyamtham ba khai ah leng ne bi ciah kya ci. A ni no a pyein cu k’chang shing tumat täi tumat täi cu a k’nga a pang lo a hlo ah bi hnging ciah kya ci ci ne pyein ci. Christian k’chang gui no a mi läk vai ah m’hteng ciah läklam gui cun phih van no a k’ni ah a läk hnging vai ah teng ne bi ciah kya ci. A ni cu a kho kum däm lo ne a ng’vai lo ah hlo ah kyä lam ung goi pyam nak lah , ng’mü m’cha lam ah ng’ä cäi nak gui cu buiawt lo ciah kya ci. Bä ciah Alphonsus Liguori cu Taigü Boi gui awn a mi lak ah kä hmat lo ba u ne a kyü kä gai ne a mik m’cha lo hlei a mi ng’htoi ung ka no a mi hlot ah kya ci. A ni cu a kho kum 90 ung shi hleih a ni a shih kon ah ng’cha ng’tai ne a mi ng’ngaih kä ng’hmat ci gui ah Boiphaya gui a k’ni ah a mi ngaih ng’hmat ciah kya ci. A ni ah bi loh man gui a k’hngu ah kho m’dek pum ung yat ne a ming thang lo ci. A shi kon püi ah yumtu ng’bum ah htuh kha ming poih ci cu a mi peit ah kya ci.
