Ngthûkní ngthêi
(ktàigü 1)Tuhchü yùm ci ktû pahta kchàng gui cuh ami suhshân ktàigü kä nghlôi hleih yái ci gui.Aktúng pí ah ami ghin ah lú púm ami pyén ah ktàigü kchînglung gui amshah a ngthong ah phäh ah kya ci.A cun ah a ngthong läí cuh Kchò Bóiphàya gui no nì na neh ami mthong ah kya ci.A i ah kya hleih ci ung Kchò kchí ah ktàigünak gui ung Mvá kchî gui bòi tu laih laih hleih Kchò kchî khtüm on Kchò yùm ci ktü noh ami ktàigü tu hnging vai ah ami mthôn ba ah kya ci.Ayân ami pyân htük ung ktàigü lo ma ci gui phih acun ah kä nghlôi hleih yái man ci gui.Mà kbäih neh ami pyân ung avaihlü ah tuhchü”Na yèi tu vai Maria o,a nghtéi khmà ah na bä ci nei”ciah mi pyéin cuh”Ave Maria nang ung kyèicu bé ci”ciah pyéin man ci gui.
Akhngih veinak ami pyân ah ktàigü ung phih kä nghlôi ci gui bòi ba hleih tukbäih akthum veinak ah ami mthong ba ah kya ci.Avaihlü ah Kkhânmòpí ah om ca kami ning pá o ciah ktàigü nak ung Ingkalik ngthû ung”Your kingdom come”Mvá ngthû ung ကိုယ်တော်၏နိုင်ငံတော်သည်ရောက်ပါစေသော်”ciah ami pyéin cuh Kchò kchî on na ukchuknak avan ung yat hlä ciah ami kphlàn te ah kya ci.နိုင်ငံတော်cuh ghunkhó ah vah kya ca kya hleih ayäih ah ngphlàn khai”na ghunkhò cuh avan ung yat hlä ciah ami lat ba ah kya ci.Cun ah kya neh tukbäih akthumnak ah ami pyân ba ah Kkhânmòpí ah om ca ktàigü cuh”Kkhânmòpí ah om ca kami ning Pá o,nang ngmìng mtâm vai ah kya hlä.Na ghunkhò cuh avan ung yat hlä.Nang ngyák hlü Kkhânmòpí ah a kyak ah hlô ah khòmdek ah kkhân ah phih kya tu hlä.A khngüp tä hleih êi vai cuh na kchì khngá tu gui ä.Na kat na ci gui kami mgêin ah hlô ah kami ning kat nak cun phih na mgêin tu gui ä.Tóktap nak lam cuh na mchoh gui neh a kshé kkà ung kah na kphyón tu gui ä.
”Ayân mi pyéin nak ung tuhngói alo om ca ci ni,na pyit hmà ci ci ni cuh Mvá kchî nglung ah vah kya ci.Ingkalik kchî on our daily bread Mvá ngthû on နေ့စဥ်အစာ cuh tuhngói alo om ca ei vai cuh kä nghlôi lo hleih a khngüp tä hleih ei vai ah ami kphlàn ba ah kya ci.Cun kon ah na pyit hmà ci cuh Mvá kchî ah kya chütah na kat na ci ciah ami pyân ba.Cun kon ah temtation နှောက်ယှက်ခြင်း cuh apyit lam ciah ami kphlàn te ayäih ah kä ngphlàn lo hleih tóktapnak ciah ami kphlàn ba ah kya ci.Cun kon ah evil မကောင်းမှု cuh khò knget ah mi pyéin cuh kä kya lo hleih akshé kkà ah ami pyân ba ah kya ci.Akphyìm mcu mih neh ghí lo ci gui ah phäh ah kä nghlôi ba ci te cuh akhmó gui noh akthài ami mcu läí cuh ak’yàng ah gah ci gui.A cun ah ktàigü a ngshäî gui kä nghmat hleih mi mcu gui a om ah hlô ah kä mi mhtèih veih ah aktôi hta gui ung phih va bòi vü ci.Avâihlü ah Pá ni Htá ni ktàigünak ung Htíthéing ca muh a ngming ang?Muh ah ngmìng ang? kä nghmat hleih mi pyéin ci.Ingkalik ung of the Holy Spirit cuh Muh ah ngmìng ah ngkhái hleih pyéin vai kya ci.Tuhchü kä nghlôi hleih pyân ba laih laih cuh ngóigüt a nghlói vai phäh ah kya ci.
