M’HNGI NAK K’CANG
M’hngi k’cang om ca k’chang om ca k’chang cuh am’hngi-ah k’chnag-ah k’chang-am I-ang ka bi peit ko ci-ah a k’cum-ah ng’ngai ca k’chang-ah kia ci. Cun-ah mong cuh ng’thu k’theing-ung phih ak’da om ca kia ci. Vai hlü-ah tumat pyein-ung Boi Christu noh na mät-awn ng’et ca k’chang cuh na mät-ah kyä-ah hlo-ah na m’hngi vai ci neh pyein ci. Mät-awn ng’kho ng’et ci nak-ung mät-ah ghün om nak-ung hnguh hmat tu gui-ah k’chang gui bäng kä kia hleih mät-ah gung tu nak hlü ca k’chang gui phung ci-ah kia ci.
Gung tu ci nak-ung phih ngui, ghui khoh tang gui bäng pyein hlü-ah kä kia ci. K’chang ak’da pi noh gung tu ci-ung ngui, ghui khoh tang bä bä-ah ng’ngai hloi ci. A caw kia hleih ng’gung tu ci-ah ni ki-ah bi loh cuh k’chang ak’da noh kyüh ci gui. A m’shah noh ngui ghui bä bä-awn gung tu cuh ani gung tu-ah ng’ngai ci. A m’shah noh ngui bä bä-awn vah ng’gung tu-ah ng’ngai neh ngui ghui kä shäm tu ca k’chang gui-ah phäh ni ca mong kä bi tu hlot ci gui-ah ng’lat ci.
Ng’thu theing-ung Boi Christu noh a pyein tumat cuh a mät-ah teih püi ng’kho k’chang tumat-ah phäh-ah a hngun pe ca k’chang hlok ka tah bä pi ca m’hngi nak kä om ba ci.Shin-ah Boi Christu-ah pyein-ah k’chü m’kha cuh m’hngi nak-ah ng’pam shah nak nüt dong nak vai-ah nüt htung-ah kia ci. Mät noh mät kho chang gui phäh I hlok-ah bi peit hnging cuh teng neh ng’kho k’chang I hlok m’hngi nak cuh hmat hnging kia ci. A shin-ah nüt htung-awn mät noh mät nüt dong nak-awn mät noh mät hmat lo vai kia ci. Cun te mät-ah nüt htung-awn k’chang hngei gui hteit neh kä nüt dong tu vai. K’chang noh ana dong lo-ung phih m’lung thüi ci. Cun gui cuh hma hloi ca kia ci.
K’chang tumat-ah hngun cuh a phu däm pi ca kia hleih cun-ah mät-ah hngun cuh po k’chang-awm peit-ung mät-ung om ca aphu k’däm cuh peit-ah kia ci.Cun-ah mät-ah hngun ng’kho chang-am peit cuh a däm pi m’hngi nak m’dang kia ci. Cung gui cuh kho m’dek k’khan-ah hnguh lä ng’yak lä-ah kia ci. Boi Christu noh k’chang tumat kavai bäng kä kia hleih kho m’dek k’chang van kavai a hngun ana peit gui cuh a k’däm pi m’hngi nak a m’dang-ah kia ci.
Ca püi püi pigo tumat-ung im k’cham ang’shong-awn k’kyong khui tumat om ci. Im pe-ah ng’hai ghüng nu tumat om ci. Cun-ah k’kyong khui-ung hta k’pa tu mat om ci. Cun-ah k’hmo hta cuh ng’hai ghüng kung-ah ak’cum-ah lo neh ng’gü ng’lah ci. A sho lo-ah hlo-ah ng’hai ghüng nu noh cun-ah k’hmo hta cuh yei nak ci, m’hngi ci. K’hmo hta cuh kyong kai lo neh ng’hai ghüng kung-ah kä lo ba shan ci. Kho k’hngüp ät-ung cun-ah k’hmo hta cuh ahmai kä k’kyang hleih lo ba ci. I kia hlei-ang ci neh ng’hai ghüng nu noh ng’shih hleih ka teih püi gui noh ngui kä hta tu te kä na ng’khawt püi ci gui ci hleih cun-ung ka k’theih gui k’bit neh na yoih vai na gah lo-ah ngui-awn ayei kyai püi gui vai ci neh pyein hleih a k’hmo hta noh a caw ci ci. Kho sho lo ba hleih cun-ah k’hmo hta cuh kä yei neh gok lo ba hleih I-ah kia hlei-ang ci neh ng’hai ghüng noh ng’shik ci. Ani noh ka k’chu mah lo khai kia hleih pyu im ka cawh vai hlü lo ci. I phih kä om hlei nei ka thüi ci neh pyein hleih ng’hai ghüng nu noh ka ng’pan gui boh k’hteih neh mang-ä ci hleih a caw ci ci. Ng’hai ghüng nu lei cuh yei neh k’hmo-ah hteh ba cuh dan ci. Kho kum ak’da ng’lak lo na chü tah un-ah k’chang cuh lo ba neh kä yei hleih ng’shi ba ci. A ni noh k’hmo phih da lo neh kyong kai lo ci gui. Caw kia hleih Ngui ghui ka gah nak tu vai pinle k’kah neh ka hlum lei aung pan tu-ung vah bä khai ci hleih ng’hai ghüng noh cung-ung ka ghüng boh ghu neh ng’hle k’ko hta pyang neh na ci vai hlü ci hleih acaw ci ci.A sho ng’lak na hleih k’hmo te cuh kho kum k’cheit kyip lo lo neh ng’khun hta neh gok lo ba ci. Ng’hai ghüng noh a i-ang ahlü ci neh ng’shih hleih ka kyä m’gei neh ka ngoh nak vai ka ng’yah hlü ci ci neh a pyein. Ng’hai ghüng noh ka k’hmui-ung ngo neh ng’düm-ä ci ci.
Shin cuh puma ci-ung phih hnguh hmat vai gui, thei tu vai gui ak’da om ci.
Guk ci Man Sein Hi
