Bä ciah Briget ah ghünlu a mòng
Sweden ghunkhaw ghung m’htei ciah bä ciah Brigit cu Christu kum 1303 ung Shangpughang ah k’pakhui ng’shoon ung ka no ng’tüi lo ciah kya ci. A khokum kum k’chüih yah ge ung leng ne Khanpughi ah m’dang nak hnguh hti ciah kya ci. A khokum ghaa ung m’dang nak tumat a hnguh nak ung Boi Yesu shing m’kang k’tung ung a mi kàng ah hnguh ciah kya ci. Briget no Boi Yesu am a u no shing ah ning ci ci ang ci ne ng’shi hleih Boi Yesu no a m’shang cu “Kei na u sheih ne kei ah m’hngih nak kä ng’yak hlü ci gui no a shin ah a mi na ci” ci ne pyein ci. A cun ung ka no leng ne Boi Yeisu ah yaica Buiawt nak Brigit ah ghinlu ung a k’tung ah kya lo ci. A ni cu k’kyawng k’khui awn kho kum 28 ung yeikyai ne a k’hmo 8 gah ciah kya ci. A cun ah a hta gui ung ka a k’taknga pi ah kya ciah Charles cu a phäi naa gui awn kä täng ne a kya ah hlokyan ciah kya ci. A hta k’hngumi hta Catherine läi cu a nu ah beit ng’ngai ne a nu ah läklam gui thei tu ne läk tu ciah kya hleih yumtu ng’bum ung bä ciah k’chang tumat ah kya lo ci. A cei shih lo hleih a ni cu Third order of St. Francis un glut tu ne ng’phep guih ne du nak lah k’taigü nak gui läk ne k’tha nak ciah kya ci.
A k’hmo hta yah ge ung leng ne a ng’vai lo ah chüt ta gah ah m’dang nak a cum ah a hnguh cu a ni ah Mamah a ng’vai am a m’thein vai ah m’dang ci mät no a pyein ah kya ci. M’dang nak a hnguh gui ung ka tumat cu Boi Yesu no a ni am Mamah gui cu a mi du ah khan ah a mi gah hta ah ngui gui cun phih duyai ci gui am pe ci gui. A cun ah kya tu lang pang hleih phih nga mi gui ah kut ung a mi ng’shäm nak ah ca uk gui cu a mi ng’yak hlü ah hlo ah shäm ci gui ci ne pyein ciah kya ci. Brigit cu Pastine ah k’hmät hta düt phih Phaya phuu kä hteit tu man ciah kya ci. A ni cu a shih ah chüt hleih Roma Mânggo ung om ne yumtu ng’bum a k’ni lam ah a ng’thong hlah vai ah m’thei m’thang ci. A ni cu a k’hngüptäi hleih kat k’pyhon nak lak ne a k’cum ah gaih hta ne om ciah k’chang ah a ng’ming thang ciah kya ci. Bä ciah Brigit cu Christu kum 1373 ung shih ciah kya ci. A ni cu Jerusalem ah a hta k’hngumi Catherine awn a ni hteh kon ah shi hleih Catherine no a nu ah gok cu Sweden khaw ah hteih ba püi ne a nu ah m’düi ghüt ah kya ciah The Religious order for the holy savior) Vadstena ung a mi k’phuh ah kya ci.
