GEIT M’SHI
K’chang päng-ung ni ca geit m’shi cuh Khanpughü noh phu sho pe ci. K’chang päng-ung ni ci gui päng bi hlü , pyein hlü-ah m’shi ni cuh om ci. Cung phih m’shi k’ni ang’lih pyo, a ghün hlei vai cuh tui k’ni m’dek ni hlü ci. Cun-ah tui k’ni m’dek ni kä om-ung geit m’shi bä hleih ani-ung phih di khai. K’chang tumat a ng’tüi lo tu-ung a htik pi a hnguh cuh a nu-ah kia ci. Cung kon-ah a hngei gui hnguk ci. Kä cun pha-ung a nu-ah puk khui kiong-ah k’cha k’ko om cang ci. A nu a hnguh a hmat kon-ah a pa, a phäi,a be gui cuh hnguh hmat lo ci. A ng’vai lo-ah ci-ah im ng’gü lo ng’phei om lo ci. Cun noh a ghün om nak cuh k’khuih vum lo ci. A om k’ih, a k’chü ng’hta gui phung cuh im ng’gü ng’lo ng’phei noh lin ci. A caw kia hleih geit m’shi ani-ung phih im ng’gü lo ng’phei kä ni-ung geit di khai. Caw kia hleih im ng’gü lo ng’phei ni khai pyan vai hlü lo ci. A caw kia hleih im ng’gü lo ng’phei ni khai pyan vai cuh Khanpughü noh ana täk phan-ah ma mong-ah ng’ngai neh bi vai hlü ci.
K’hli-awn om vai tün nak cuh k’kyong khui-ah kia hleih k’kyong khui k’om päng noh amät phäh phäh-ah hlü ca ma mong cuh a hmat vai hlü ci. M’hngi nak yei nak-awn be ca k’kyong khui-ung kah lo ca k’hmo gui cuh avan-ung a ng’yäk ng’chan tu vai yäk ci. Ng’gen aam nak, ng’hlut ng’hngit nak acum-ah om ca k’kyong khui-ung kah k’hmo hta gui cuh ami ng’yäk ng’chan tu vai lam ng’kang ca kia ci. Nu pa-ah m’hngi yei nak kä gah ca k’hmogui cuh ami ghün om nak atai lo vai ng’hngän ca kia ci. A m’shah nu pa gui cuh k’hmo noh kat nak tumat abi-ung ni hleih k’shet aam na neh ,ak’ni ak’bä tumat abi-ung m’tam vai k’hmih ci gui. K’chang päng noh a bä nak m’tam vai ng’ya hlü ci. Bä ng’mang lo-ah phäh ni ca m’tam khah nak kä ng’ya hlü ca k’chang kä om ci. A m’shah noh m’tam khah kä ni ca a ng’ngaih-awn m’tam khah kä yum ca ng’shäi neh tumat noh tumat k’khak-ah ng’ngai neh m’tam khah vai ng’gün ca k’chang k’hli ng’bum-ah k’tha a kyen nak gui cun phih om ci.
Vai hlü-ung kah a k’hmo ca ng’shi k’ca nak-ung kah ng’thei nak tumat ku ku -ung a ng’kyak-ung htung-awn m’ghuih neh boh kä cun-ung k’sat aam nak ci gui. Cun te ng’thei ng’tham nak-ung ak’htük pi boh , ak’hngih nak boh a gah lo-ung aca bo tah akia-ung va ä,ka hleih m’kai gui kia neh ci düit neh k’hmo-ah k’tha nak tu kä hmat nak tu peit thei gui phih om ci. Cun cuh nu pa gui-ah k’tha a kyen nak gui-ah kia ci.
Shui lei k’täk chä ca k’chang gui noh “k’chang tumat-ah abi loh nak hnging vai k’tha gui gha-ung kah tumat hlok vah mang ci.” ci pyein ci gui. K’poih ba ca k’ko cuh vun neh m’dang hnging-ung cäi cat vai-ah ng’ng’yäk ng’chan nak cuh hnguh hnging kia ci.
Geit m’shi-ah phäh ni ca tui,ni ca m’dek ahlü-ah hlo-ah k’chang tumat a hlüng tai lo vai cuh gung tu nak lah lam m’shüm tu khai k’chang a om vai cuh a tung pi hlü ci. Mikmi tumat noh tumat mi ng’gung tu ng’kyu-ung mi k’chang hli ng’bum lah mi kho cuh ng’yäk ng’chang lo khai k’cheng kia ci.
Guk ci………..SAYATO MAN SING HI
