Bä ciah Maria Magdalena ah ghinlu a mòng
Maria Magdalena cu Martha lah Lazarus ah na ah kya ne kap mah k’chang tumat ah a ng’ming thang ciah kya ci. (Luka 8:2) ung a ni cu Bethani Mânggo ung ka kyat u lang ne Galilee ung om ciah Magdala ung a m’lung nga ng’thong hlat lo ne Magdalena ci ne van no a ng’ming a mi hmat lo ah kya ci. Boi Yesu cu Pharizeu k’chang ah kya ciah Simung ah im ah ei a ei tu yah ung Boi Yesu ah kho cu a miktui awn ghût ne k’chitui ng’ui awn hluk ciah kya ci. A cun ung ka no Boi Yesu no a ni ah kat nak a daa k’pyhon yei nak ciah kya ci. A cun kon ah Magdalena cu Boi Yesu ah hluläk k’chang ka vai ah bi bi tu ci cah k’cahng ah kya lo ci. Kho k’hngüp ät ung Boi Yesu cu Lazarus ah im ah hteit ne om tu hleih Mary no Boi Yesu ah kho kung ah ngoh ne Boi ah pyein ng’ngai hleih a pai hta ah kya ciah Martha no Boi Yesu ah maa ah Mary cu a k’chaak ah kya ci.
Cung phih, Boi Yesu No Martha, Martha nang cu, a päng a kya bi ne nang ng’ä ci. hlü ci tumat bäng vah om ci. Maria cu ni tu bä ci ghü ne bi püi ciah kya ci ci ne pyein ci. A ni ah ka cu kä lak ba peit ah om khai, acun cu a í no phih kä m’dí hnging khai ci ne pein ci. (Luka 10:41-42). Boi Yesu yaica tukkhah gui kä biuawt nak vai kho k’hngüp k’chuk a k’poih ba yah ung Lazaurs ah a im ah hteit ne a om tu yah ung Maria no Boi Yeisu ah kho cu natuh k’chitui ng’ui awn hluk hluk peit ba mä ciah kya ci. A cun hnguh ciah Judascariot no shin ah a phu kyüi ciah k’chi tui cu a mät no a mang hlü ah phä ah shin ah k’chitui a kho lä düt ah kä ci ein ne yoi ne ta duyai ci gui am peit vai hlü ci ci ne ng’vang ne pyein ciah kya ci. Boi Yesu no pyein ne nong ein ä, ka ng’phuh nak vai ah k’hngüp ah phäh ah güm hlä. Dudoong ci gui ci a ng’däih ah nangmi gui awn om ci gui. Kei cu cun ah kä ka om tu khai ci ne pein ci.
A k’hngüp k’chüih ung a k’htük hngüp kho ngoi hta ah ng’dot hta ne Maria Magdalena lah a hei k’hngumi k’hngih cu Boi Yesu k’phuh nak ah m’cimhngün hteit u hleih ng’phuh lungkhui khai nak lung cu m’hle ah kya hleih hnguh ci. Khanhtapup k’hngih a bok hta hlui ni ne kyum lo ni ne, k’chang k’shi a om nak ung a k’ghüng a I ah kya hlieh ang na mi shui ci ang? Boi cu shin ung kä om ci. shi nak ung ah ghüng lo ba püi ci ci ne pyein ci. Yesu no k’hngumi aw, a í ah kya hleih nak yap ci ang. A u na shui ci ang ci hleih ng’voong m’tät ah ng’ngai ne, “Nang phäi hta na lak ah a kya ung na tha nak na k’hmuh tu ä. A ni cu ka lak khai ci ne a ni am pyein ci. Boi Yesu no Maria aw ci ne a chü lo kon ah Boi Yesu ah hmat lo ne Maria no hteit ne k’kyop ci. Boi Yesu no kä na k’pang ein ä. A í kya hleih ci ung kei cu Pa ah kä ka kai pha ciah kya ci. Cuntu pang ah phih ka na gui ah hteit ä. Ka pa lah na mi Pa, ka Khanpughi lah na mi Khanpughi ah ka kai khai ci ci cu hteit ne m’thein gui ä ci ne pyein ci. (Yohan 20: 11-18)
