Brindisi Mânggo ung ka Bä ciah Laurence ah ghünlu a mòng
Capuchin Yahteih gui ung a ng’ming thang tu pi ciah Bä caih Laurence cu Christu kum 1559 ung Italy ghunkhaw Brindisi Mânggo ung ng’tüi ciah kya ci. Laurence a ng’tüi lo nak kä sho pha hleih a ni ah Nu lah Pa cu shih ci goi ah kya ci. Laurence ng’kyäng lo hleih a pukho no Venice ung om ciah St. Marku College ung ca a ng’thei tu vai ah a mlkai tu ah kya ci. A cun ung ka no Padua University ung ca ng’däih ne ng’thei tu ci. A cun ah Padua University ung ca a ng’thei tu yah ung k’chü a hei hei gui hnguh hmat ciah a ni a ng’tüi yah gei ung a hnguh hmat nak gui cu ng’dang ciah kya ci. A kho kum 23 ung a ni cu Venice ung Taigü Boi ah kya lo tu ciah kya ci. Taigü Mâng ah a kya lo kon ah m’thei m’thang nak ung ghuih ciah a ng’ming thang lo ciah kya ci. A ni ah hnguh hmat nak awn ca uk gui a k’daa guk ci ah phih kya ne Judea k’chang gui ah m’lung k’nga ng’thong hlat khai ah phih ci hnging ciah kya ci.
Bä caih Laurence cu hngu lam ah hnguh hmat k’chang gui a k’daa no kä mi hnguh hmat man gui a k’daa cun phih hnguh hmat ne m’dang ciah kya ci. Hebrew k’chü a k’ni ah hnguh hmat ne ng’hta ng’ko thei ciah kya hleih Italy ghunkhaw ung om ciah Judea yum nak gui ah hngu ah a m’tei m’thang vai ah a mi tüih ah kya ci. A cun ung phih a ni ah m’thei m’thang cu k’chang gui no ngak u ne m’tam ci gui ah kya ci. Christu kum 1598 ung Papa Shangpughang a k’chüüt nak Clement no Bä caih Laurence am hlehlak ah vuata gui m’dí k’hmaih vai ah phäh ah ci ne Jermany ung Capuchin Yahteih kyawng cu k’hm0n hlak ciah kya ci. A ni cu Hangry ghunkhaw ung Turky ga kap gui m’chüt ne a k’däm vai ne a bi yah ung a aung tang nak vai ah lam cu pyamtham ne m’dang hnging ciah kya ci. A mi n’gtukah yah ung crusu gui kot u ne a mi ng’tuk vai ah a gak’kap gui am m’thein gui ci. A mät no phih Crusu kot ne ng’hle ng’cum ne maa ne khong mang gui ne htei ciah kya ci. A k’ni pi ah ng’phlan ci cu ngami ah kä mi ng’gei ng’cam nak cu ng’tukah nak vai ah phäh ah kä kya ci ci ne a mi hmat lo a mong cu Laurence ah aung tang ciah m’cäi m’ä gui lah dìmkyäp nak a pyan hnging no m’dang ciah kya ci.
