Beit kä ng’yak ca hmo hta gui i hok cha m’hting vai.
Beit kä ng’yak ca hmo hta gui i hok cha m’hting vai mong cuh ka ning m’thein tu gui hlü ci.
Mi pei-ah gui-ung nu pa gui noh m’lung kä lo hleih ami hta k’hmo k’tho gui ami k’se nak gui-ah hlo-ah ami hta k’hmo gui noh phih ami nu pa ami beit tu ba nak gui cuh mi hnguh khai kia ci. A k’hngät nu pa täng ka noh teng-ung phih a cang-ah hlo-ah hta k’hmo täng ka noh teng-ung phih a cang nak gui cuh hnguh hnging kia ci.
Cun-ah hlo-ah akia lo-ung nu pa gui noh hmo gui-ah lu k’chawk a gham lo cuh hmat vai hlü lo ci. Shui lei neh hnguh hmat ca sei bawi gui noh lu k’chawk cuh k’hngih-ah ng’pai ci ci neh pyein ci gui. Lu k’chawk cuh k’ka täng lah k’khan täng ci-ah k’hngih-ah ng’pai ci. A k’ka lu k’chawk cuh m’lung ng’ngaih gui-awn ng’pak ca m’lung-ah sheit,kyüh kyawk nak , ng’ä ng’cäi nak lah hnguh hmat nak ci-ah m’lung ngaih gui-awqn ng’pak hleih bi bi ci. A k’khan lu k’chawk cuh ng’ngah tüh hmuh hmat nak gui cuh bi pi ci. Bü ceng nak gui tha neh bi bi nak gui , vuuk nak gui a om lo-ung m’cha m’lang nak hnging vai ni, m’lung-ah ng’ngaih gui m’hting nak lah k’kyep nak ni, k’bä nak chah nak gui cuh bi ci. Cun te kum gha phlän ca k’hmo tho gui-ung a k’khan täng lu k’chawk cuh bi kä bi pha ci. A k’ka lu k’chawk bäng gham pha ca kia ci. Kho kum (25) alo lo-ung vah k’khan täng lu k’chawk cuh a be-ah gham lo ci. A khan täng lu k’chawk cuh ak’ni bi kä bi pha ca kia hleih a mi m’lung cuh a düp-ah kä om pha neh a phe phe gok ca kia ci. Cung phih bä cang nak gui-awn lei cuh kä hla ci.
A caw kia hleih kum gha phlän pha ca hmo k’tho hta gui noh ng’vai gui-ah beit kä mi ng’ngaih lah ami m’shang tu ba gui cuh hnguh hnging kia ci. Kei cuh nu pa ka kia ci i vai bä k’hmo-ah k’chü k ng’ngih vai-ang? i vai bä k’hmo ka üm tha vai-ang ci neh mi va kia vük ci. Tuh chü k’hmo tho gui mi teng ami ng’thei-ah ca , ami teng-ah ( social media , Internet ) gui-ung ka noh ami hnguh hmat da lo ci. Nu pa gui noh nga mi cuh k’hmo yah ci gui i kä hmat pha ci gui ci neh m’cäi gui hlü-ah m’lung cuh ng’kyäng tu ba ca k’hmo gui-ah tah da pi ci. K’hmo noh beit ana ng’yak vai ng’yak hlü-ung ma neh a k’chü cuh ng’ngaih peit vai. M’lung a sheit-ung asheit-ah ci-ah k’hmo ng’aa ng’ca khai , a m’lung ng’yo yo khai , thüi hlei hlei khai-ah kä beit vai. A k’ni vai täng k’hmo nän hlü-ung ana yum , ana läk ana ng’thei nak hlü vai-ah ma neh k’chü kyo om ih nak gui-awn m’dang peit vai.
Hta k’hmo gui-ah k’chü ng’ngaih peit gui vai. A mi m’lung k’tha a däm lo vai-ah k’tha k’khah tu peit gui vai. Nga mi cun phih kyong ami kai nak-ah ca ng’thei ching k’pha neh ami hteh vai k’tha nak ci gui . Saya gui-ah beit cuh ng’ngai ci gui. A mi lo ba-ung mä nu pa gui noh na mi ca bi cang vä, phone, TV kä teng cang vä ci neh mä ami m’hting ba gui. A k’hngüp-um kä k’chü tu ba-ah beit bäng ami ng’ngaih vai-ah pyein lo nak gui laih laih-ung ami k’üüp-ah m’lung cuh phu neh ng’hmong lo hleih ak’se k’se düit-ah m’shang lo tu ba ki gui-ah kia ci.
Nu pa gui noh k’hmo k’kyep nak aih gui m’kyen-ung nga mi-ah beit ng’yak nak cuh hlüng lo khai-ah kia ci. Nu pa gui noh k’hmo ami m’cäi-ung ami lu k’chawk-ung m’hting nak tha neh k’hmo k’kyep nak k’hma gui m’kyen-ung hta k’hmo gui cuh beit ng’yak ca , a nu pa üm tha ca k’hmo hta gui-ah kia lo khai gui ci neh ni m’thein tu gui hlü nei.
