Bä ciah Pavol Gojdic ah ghinünlu a mòng
Peter Gojdic cu Christu kum 1888 ung Presov Mânggo ah pei ah om ciah piggo tumat ung ng’tüi ciah kya ci. A cun ah Mânggo cu hliip lam Slovakia ung hlui tak a kya ah be ne kho m’htung nu gui ah ng’lak ah om ciah kya ci. Peter Gojdic cu Catholic Boipaya tumat ah a hta ah kya ci. Christu kum 1907 ung Tamah hnguh hmat nak gui Presov ung ng’thei ng’thang ne ta Christu kum 1911 ung Budapest ah Taigü Boi ah kya lo tu ciah kya ci. A ni a pa a om nak ah Boiphaya kyawng ung Taigü khem tumat ah kya ne a shäng bi ciah kya ci.
Christu kum 1922 ung Cernecia Hora ung Bä ciah Basil no a m’düih ah ng’htoi ung a ghünlu ng’gun ne gänap ne Pavol ci ah a ming cu a lak ah kya ci. Khanpughi ah peit ah k’thagui bä khäk nak awn k’hmei hta gui ah pa tumat, duyai k’chang gui ghunhtot ciah k’chang tumat, goi pyam ne a mi kyähla m’neh ci gui aa peit gui khai ah k’chang tumat ah ka kya hlü ci ci ne Khanpughi am k’taigü ne ng’shang man ciah kya ci. A ni ah bi loh gui cu a kyaa ah m’nai tu vai ah kya ci. Hmei hta gui ah om nak vai im co ne, ca ng’thei nak vai ah Greek Kahtolic kyawng gui cun phih co ciah kya ci. Khanpughi ah mong lam gui thä hla m’thei m’thang nak vai ah Taigä khaw a k’thai gui phih m’düih ciah kya ci.
Christu kum 1948 ung Comunites gui no aanaa gah lo u hleih Greek Kahtolic yumtu ng’bum cu a kyaa ah kalu lo nak ci gui ah kya ci. Ghunkhaw a mong lam gui ah phäh ah Roma Mânggo awn kä ng’phan ein ba vai ah k’tha lo nak ci gui ah kya ci. Taigü Mâng Pavol Gojdic cu ghunkhaw mong lam ung k’tha na ne a bi tu vai ci ne chü a mi shä cu ma ne ngami gui ah bi nak ung kä bi tu hnging khai ah pyein ne dam ciah kya ci. Caä tün ne a na om vu lä ciah cang lam ung a mi hngun peit man ci gui ah bä ciah k’chang gui a hlo ah kei ah yum nak cu a ngoiä phih kä ka nong hnging khai ci ne pyein ne Kei ah om nak ah kä lo ein ä ci ne m’hteng ne pyein ciah kya ci. A cun ah a pyein Comunites Pati no ng’yak lo ne Greek Catholic Phayakyawng gui khai peit u ne Taigü Mâng Pavol Gojdic cu thong khui ung a mi chum ah kya ci. A heng kum k’chang gui a k’daa ah ma ah a mi ng’shi k’ca nak ung a ni cu ghunkhaw lam ung k’chü khän kä lä ciah k’chang ah mi k’bäi u ne ta a shi ah chüt hleih thong khui k’kyawng ah a mi chum vai ah a mi phukpit ah kya ci. A cun ung ka no len ne Taugü Mâng Pavol Gojdic cu a kya ah tuk that ne a mi ka lu nak ah kya ci.
