Carmel m’htung ung ka ng’lamihta Maria a mong
Carmel ng’lamihta Maria cu Israel ghunkhaw, ung Carmelit Yahteih gui lah Yahyeih kyawng ghung m’htei ciah kya ci. BC 850 Prophet Elija ung ka no leng ne Carmel m’htung cu htitheing ciah hngün, Khanpughi ah k’chü m’cäi k’chang gui no a mi läk nak ah hngün ah kya ci. A cun ung Elijah Prophet no Baar Khogam ah Khan ah Khanpughi ah m’yung aa naa om ci ci ne Israel pakhui k’chang gui am a m’dang vai ah ng’bum hlak gui ciah kya ci. Christu kum 1150 ung bä caih Beltho no Khanpughi ah nu ah ghung m’htei nak ah k’kaa ah tha ne Carmelite ng’htoi cu m’düih ciah kya ci. Ng’phep guih ne duu nak, kyünhloi nak lah düüm ah om nak gui ah läk lam vai gui cu pyang tham ciah kya ci. Crusade ng’tuk ah nak ng’päng lo hleih bä ciah Simon Stock cu Khanpughi ah mong lam thähla m’thei m’thang nak ung a ng’hloi tu ba vai ah Carmelite ng’htoi cu ng’yoi ne a mi ghinlu m’ghin ciah a ng’htoi tumat ah a kya lo vai ah pyamtham ba ciah kya ci.
AD 16 ung Calced Carmelite ci ah läklam gui a k’ni ah kä läk ci gui lah Bä ciah John ah m’thonghlah nak ung läk ci gui ci ah k’hngih ah ng’pai ci gui ah kya ci. AD 16 ung Avila Mânggo ung ka Bä ciah Theresa no a m’düih ah Discaled Carmelite ng’htoi cu a k’ni pi ah kya lo ci. Carmel m’htung Scapular um m’nai cu Nu Maria no a m’dang man gui a k’tung pi ah kya ciah kya ci. Christu kum 1251, Julu k’cha 16 ung bä ciah ng’lamihta Maria cu England ghunkhaw Aylesford ung om ciah Carmelite a ng’vai ah kya ciah bä ciah Simon Stock am a m’dang ah kya ci. A cun ah a m’dang yah ung Scapular pe ne ta a shin ah Sacapular awi ci phung a u phih nga tu nga ne ghung m’htie nak gah khai ci ne pyein ciah kya ci.
