K’kyong khui gui kä ng’tai-ein vai phäh
K’kyong khui tumat k’hlüm ci cuh k’hnguh mi lah k’pa mi noh k’tha na neh ani m’düih-ung kä ng’gäi khai. Cun-ah k’tha na neh bi loh nak-ung vuuk nak gui ak’da a om lei cuh k’kyong khui mah päng noh hmat ca kia ci. K’kyong khui kä khoi pha-ung pong htei nak kyen ci cuh a hlü nak gui da tu ba ca kia ci. Cung phih tumat noh tumat a hmat nak peit thei-awn cuh k’hlüm-ah kia ci. K’chang goi ng’khah lo-ah kia neh m’lung phäh phäh-awn mät-ah ng’ngaih phäh phäh-awn om man te goi cuh a täng-ah om lo kia neh hmat nak peit thei-awn ng’thung tu ng’kyu cuh k’kyong khui a khän vai phäh a k’ni pi kia ci.
K’kyong khui tumat k’hlüm vai phäh nu ghü pa ng’vai gui noh ami chum bui hnguh hmat lo gui ng’shon hleih ami m’thei m’cäi nak gui kä om vai hlü-ung k’kyong khui k’thai mah gui ka vai vuuk nak-awn be khai hlü. A m’shah cuh a ng’yak hlü-ah k’kyong khui ka vai a bü ääp nak om ci. K’ kyong khui tumat akia lo-ung hon gui tah ääp neh gah ci, hon gui tah ääp neh kä gah ci ci gui cuh nu ghü pa ng’vai gui noh ng’dawt neh a mi m’thei nak-awn hmat tu ng’dawt hnging kia ci. Cung kon-ah k’hngu mi lah k’pa mi cuh ani mät-ah ng’tüi püi phäh phäh-ah m’lung ng’ngaih gui-awn om phäh phäh te ci goi kia neh ng’thong hlah vai kä ng’hloi lo ki.
K’kyong khui ng’tai vai cuh ng’tai man ca k’kyong khui-ung ka noh lo ca k’chang noh phih k’kyong khui a ng’tai vai tän-ah k’hmawn thei ci cuh phih om ci. K’hmo yah ca k’chang gui-ah k’kyong khui gui cuh a mi ng’tai vai cuh yäk ci. A nu pa ng’tai man ci gui-ah hta k’hmo gui kia kung kä ng’ngah tüh thei ci da ci. Nga mi cuh ami nu pa gui-ah ng’tai nak man-ah mong gui cuh ng’ngah tüh ba neh a k’ni vai cuh ng’thei ng’tham tu hnging vai ami k’tha nak vai hlü ci.
Tuh chü kä ng’khah pha-ung ng’gah ci gui da lo ci. Cun gui cuh ami ng’tai vai phya-ung (70) vai om ca mong cuh hnguh hmat ci gui noh pyein ci gui kia ci. K’poih ba ca (30) cuh ani om thei nak , khanpughü-ah m’thei m’cäi gui ani läk nak a om-ung vah khäng khai kia ci. A co kia hleih ng’khah yä bo neh ng’tai yä bo neh ami kia kung ni tu ba khai.
Ng’tai nak vai hnging-ah ma mong gui a om lo-ung kä ng’hloi nak gui phäh hnga k’phlang khai teih püi boh nu ghü pa ng’vai boh hlü ci. Ng’chu ng’la goi kä ng’hloi nak gui a om lo-ung ng’cuh neh gah ci, ng’tuh lei kä ng’tuk-ein vai hlü ci. M’lung a sheit-ung phih mät-ah ng’ngaih gui cuh tumat noh a k’ni-ah hmat khai-ah m’thein tu hnging vai k’tha nak vai. Vuuk kat nak gui a om lo-ung Khanpughü-ah ma-ah ng’khah te cuh shüm ba neh ng’pyan ba vai. Ng’gen am nak a om lo-ung a i-ah kia hleih ani-awn a täng-ah om lo-ang?, a i kia hleih yum m’hngi te-ang? ci gui cuh ng’ngah tüh ba neh mät noh mät a k’no pi-ah ng’pyan ba vai.
