Bä ciah Bonaventure ah ghinlu a mòng
Seraphim Khanhtapup lam ah kya ciah htuhkhaming ci ne a ming Thang ciah bä caih Bonaventure cu Italy ghunkha ung ng’tüi hleih a nu lah pa no Giovanni di fidanza ci ne a mi hlui ah kya ci. A khokum 4 ung ka a kya ah goi ciah kya ci. A khokum 22 ung Franciscan ng’htoi ung lut tu ne a ni ah ng’ming cun phih maa lam ah yeikyai vai ciah ng’phlan ciah Bonaventure ci ah a ming a m’thong ah kya ci. A ni cu hnguh hmat vai khin ci gui a van a k’ni ah a ng’thei ng’thang vai ah phäh ah Paris Mânggo ah a mi tüih ah kya ci. A cun ung ka no tün ne bä ciah Aquinas awn leng ne ng’gei ng’kot tu ci ah kya ci. Bä ciah Thomas no a ni am hnguh hmat nak ah a ng’yung cu a hoi ka no ang a leng ci ne ng’shi hleih Bonaventure no Boiyesu ah crusu ng’tung cu k’hmuh ciah kya ci. A ni ah a hmai ung yeikyai ci vai hlü ah a k’cum ah a ng’dang cu a ni no a pyein man ah ng’mü m’cha lam ah yeikyai nak cu k’chang ah m’lung ung om ciah Khanpughi ah bä khäk nak ka a k’däm pi ah ng’dang ci ci ne pyein ci.
Bonaventure cu a kho kum 35 ung Francisan ng’htoi ah a ng’vai tu mat ah kya lo khai ah a mi ghü ah kya ci. A mi ng’htoi ung duyai nak ci cu a mòng a hei hei ah ng’phlan ciah ci u ne a mi ng’cha ng’tai gui ä tba khai ah pyang tham ba ciah kya ci. Kho k’hngüp ät ung Thomas no Bä caih Francis ah a ghinlu a mong a guk cu Bonaventure no a om nak ah m’kot lo ung ka no m’htei ne teng tu ciah kya ci. A cun ah a teng tu cu Thomas no hnguh lo ne Bä caih k’chang cu Bä caih k’chang ka vai ah bi hnging vai ah ci vai ci ne ng’düi lo ne htei ciah kya ci. Christu kum 1273 ung Papa Shangpughang a k’chüih nak Gregory no Bonaventure am Albano ah Mânggo ah Taigü Mâng lah Cardinal tumat ah a k’hmoh ah kya ci. Cardinal ah luchüm a hlen lah a mang vai gui kot ne Cardinal a hteh yah ung Bonaventure cu ei ok shon nak ah ei nak ah pakan gui m’shi hkeih a mi hnguh ah kya ci.
A ni no a shüm ah k’chü cu “ Religion is doing ordinary thing perfectly” ci ah kya ci. Bonaventure no a guk ah Khanpughi lam hteit ciah m’lung m’cha ( The mind’s Journey into God) ci ah ca uk ung a guk nak ung “Yeikyai nak ci cu hlüngtai pi ne bä ci ung yei ne om ah kya ci. A í ah kya hleih ci ung hlüngtai ne bä ci cu k’khan ah om ci” cu ne guk ciah kya ci. A ni cu Christu kum 1274 ung Pyinhtit khaw ung a mi bi ah a hngih vei nak Leon Council a kai tu yah ung shih ciah kya ci.
