Bä ciah Camillus de Lellis ah ghinlu a mong

Seiyung gui ghung m’htei ciah Bä ciah Camillus cu Christu kum 1550 ung Italy ghunkhaw ung ng’tüi ciah kya ci. A nu cu Camillus a hta nak yah ung a khokum 60 be lo püi ciah kya ci. Camillus a k’hmo yah ge ung ga k’kap ng’htoi un glut tu ne kat nak gui bi ciah k’chang tumat ah kya lo ci. A khokum 25 ung a ng’gü nak awn a sham ah a kho tang gui phih a van m’dí m’hmaih yop hleih Carpuchin Yahteih kyang ah hteit ne bi bi tu ciah kya ci. A cun ah kyang ung om ciah kyawng uk no m’thein m’cäi tu hleih a k’hngu ah a m’lung nga ng’thong ng’hlat lo ne a mät no mät Khanpughi am m’ap ciah kya ci. Carpuchin Yahteih ng’htoi un glut tu hlü te ci a ni kho ung om ciah yoka a phäh ah kä lut tu hlot ciah kya ci. A kho a m’neh cu a kyaa ah kyühkyok vai ah kya lo hleih Roma Mânggo ung om ciah San Giacamo seiyung ung a mi ng’düm hlak ah kya ci. A cun ah Seiyung ung om ne bi bi ci gui cu goi pyam k’chang gui kä chü m’gein gui ne a k’ghüng ah k’phuh hti ci gui ah kya ci. Camillus cu a cun ah goi pyam ci gui k’chüm’gein gui ne a k’ni ah m’htei m’hta ciah kya hleih a k’hngu ah a ni cu Seiyung teng ne m’htei ciah a ng’vai tu mat ah kya lo ci.

A ni cu goipyam ci gui m’hngi nak lah m’nai nak awn  m’htei m’hta hnging ciah kya ci. A mi ei ok gui awn a mi k’tha om khai ah ci peit gui ne, a mi om nak hti thein khai ah pyang tham ciah kya ci. Camillus cu Christu kum 1548 ung Boiphaya tumat ah kya lo ci. Boi Phaya a kya lo kon ah seiyung gui ghung m’htei khai ah Clerks Regular of a good death, Ministers of the sick ci ah ng’htoi tumat m’düih ciah kya ci. Camillians ci ne a hlui ah a cun ah ng’htoi ung om ci gui no kä gai ci gui cu Boi Yesu ah hnguh ne a k’ni hta ah m’htei m’hta ci gui ah kya ci. Camillus no a pyein cu “ Shin ah kho m’dek k’khan ah yaica nak buiawt ci gui kä om ung kho m’dek k’kyawng ah shui ne k’pyhon gui vai” ci ne a k’chang gui am pyein ciah kya ci. Christu kum 1588 ung Camillians a m’shah cu Nipal tuik’kam lam ah htei ne htipow k’khan ah yoka gah ci gui hteit ne ghung tu ci gui ah kya ci. A cun ah a mi ghun tu yah ung yoka gah tu ne shih tu ci goi ah Camillians k’hngih cu a cun ah Ministers of the sick ng’htoi ung maapi k’bäih ne bä ciah k’chang ah kya lo ci goi ah kya ci. Bä ciah Camillus cu a mät yoka gah tu ne a kya ah m’neh ne yai tu lang pang ne phih Genea Mânggo ung a shih ah chüt hleih goipyam ci gui m’htei m’hta ciah kya ci. Bä ciah Camillus cu Christu kum 1614 ung shih hleih a ni cu goipyam ci gui ghung m’htei ciah bä ciah k’chang tumat ah yumtu ng’bum no a hlüng m’tai ah kya ci.