Bä ciah Veronica ah a mong

Bä ciah Veronica ah ghinlu a mong cu a hoi ah phih a k’ni ah a mi guk cu kä hnguh ah kya ci. A ni ah k’chü m’gein awn Boi Yesu yaica buiawt ne a kya yah ung Boi ah hmai pavua awn a ghut peit hleih a cun ah pavua ung Boi Yesu ah ghui hmai k’poih ghüt ne a ng’dang cu Veronica no a k’hngu ah a hmat ah kya ci. A cun ah kya hleih Veronica cu Boi Yesu gakap gui no kalu nak u hleih yaica nak gui a buiawt yah ung om tu ci ci cu mi hmat tu ciah kya ci.Boi Yesu Golgotha m’htung ah a kai nak ah lam shing m’kang k’tung ah kaa ah kyu ne a ng’täng yah ung Veronica cu lam pei ah ng’düi ci ci ne a mi pyein ah kya ci. yum nak lam ung k’thaa na ne läklam gui a k’ni ah bi nak ung cu ng’dang tu pi ciah kya ci. A cun ah läk lam gui cu a k’tung pi ah kyünhloi ne om yah a kya ciah lent hngün ung bi ah kya ci.

A cun ah läklam gui cu mi mi kat mah k’chang gui am Boi Yesu awn a täng ah Boi ah Yaica nak gui ung ghunhtot ne lam m’shüm ciah kya ci. A ni cu tukthat ne a shi a daa lut lo k’khai ah kalu na ne a mi ci cu hnguh ne a kyaa ah k’chü  m’gein ne a lang hta ah a gung htot tu cu ng’dang ciah kya ci. A mi kalu nak ah Boi cu a û ah kya hleih a í ah phäh ah a cun ah a mi kalu nak cu a ni no kä hmat ciah kya ci. Cun tu pang ah phih a hmai a ghut nak peit ah pavua ung k’poih ghüt ciah Boi ah hmai a hnguh lo kon ah yaica khai ah a mi kalu nak ah k’chang cu a û ci cu hmat lo ciah kya ci.